Ha kawei na ka jingjia ba sngewsih, uwei u khynnah pule ka JNV Mawphlang uba la tip kyrteng kum u Nathaniel Sohtun 16 snem ka rta, u la khlad noh hashen hadien ba u la shah bat bording. U Nathaniel u dei u khynnah uba dang pule ha ka klas XI bad u dei u khun jong u bah Kumar Mizar bad ka kong Phida Sohtun kiba shong ba sah ha Laban. Ha ka jingiakren bad u Kpa u Nathaniel u bah Kumar Mizar, ula iathuh ba ha ka 28 tarik, Naitung syndet syndet ha ka por kumba 3:30 janmiet eiei ki la ioh ia ka phone call na skul bad ki phah wan mardor ha CHC Mawphlang namar ba shitom u khun jong ki . U bah Mizar ula iathuh ba ynda la poi ha CHC ki shu ioh jingtip ba u khun jong ki, u la shah bat bordinng bad ha ka slip la thoh ba la wanrah ia u ha CHC ynda u la khlad.
Katkum ka jingong u Kpa u Nathaniel, ha ka met u khun jong ki, ki don ki dak mong na kti bad na krung bad ka ngap bad ka shyllang ruh ka at. U bah Mizar ula ong ba katkum ka jingiathuh na skul, kane ka jingjia, ka la jia ha ka por ba u dang leit sum. Ula ong ba kum u kpa u kwah ban ioh jingshai halor kane ka jingjia bad kim kwah ba kum kane ka jingjia kan iai jia ha kiwei. “Ha ka met jong u khun, kam don kano kano ka dak jngem hynrei ha ka met jong u ki don tang ki dak mong suda. Kane ka la pynlyngoh iangi ki bahaiing hasem,”ula ong.
Ha ka jingiakren bad ka Principal ka JNV, ka la ong ba kam pat lah ban ong eiei namar ba ka jingtohkit ka dang iaid ha kaba ki pulit ki dang lum ia ki sakhi satar. Ia ka met jong u Nathaniel hynne ka sngi, la rah sha Civil Hospital Shillong na bynta ban leh ia ka post Mortem.
