Iap u Nongniah ba leit tynrah nadien ka trok ba ieng ha Mawdiangum

Ha ka jingjia tyngkhuh kali kaba shyrkhei, u wei u nongniah ka trok rit u la khlad noh hashen hadien ba ka trok kaba u la niah ka leit ban tynrah na ki bynta ba shadien jong kawei pat ka trok kaba kit ia u clinker kaba la ieng harud u surok bah NH-6 namar ka jingthut ka kali, kane ka jingjia ka la jia hynne ka step phyrngap ha ka por kumba 4 haduh 5 baje eiei mynstep. Katkum ka khubor ba la ioh lum, la iathuh, ba kane ka jingjia tyngkhuh kali ka la jia hynne ka step, ha kaba kawei ka trok kaba dei jong ka Aradhaya Transport Agency kaba don ia u number AS 01 RC 1762 ka la leit ban tynrah hi nadien jong kawei ka trok ba don u register number ML-11 A 1440 ba kit ia u clinker kaba ieng harud u surok bah hajan ka shnong Mawdiangum ha Nongpoh.

Ha kane ka jingjia, u nongniah jong ka trok na ka kompani Aradhaya Transport Agency kaba dang wan na ki bynta jong ka Shillong ban leit sha Guwahati ula mynsaw jur bad ki bor pulit ka Nongpoh Traffic Police ki la poi mar mar sha kane ka jaka ban sei ia u nongniah jong kane ka trok u ba la sahkut hapoh ka kali namar ka jingjulor ka kali bad hadien katto katne por la ioh ban sei ia u ban rah pat sha Nongpoh Civil Hospital hynrei ki doctor ki la pynbna ba u la khlad ha shwa ban poi ha ka jaka sumar.

Na ka liang, ki pulit ka Nongpoh Police Traffic Branch ki dang pynlong ia ka jingtohkit halor kane ka jingjia bad ruh ban tip ia ka kyrteng jong u ne u nongniah u ba la khlad noh ha ryngkat ka jaka sah ka jong u bad la buh ia ka metiap jong u hapoh ka jaka buh metiap jong ka Nongpoh Civil Hospital.