Ka jylla Meghalaya ka la mad ia ka jingshlei um bad shah pynjulor ha kylleng ka jylla na ka jingther kynsan u slap ryngkat ka eriong ‘Remal’ ha ki ar sngi kynthih, kaba la la rat ia ki iing ki sem, ki jingthung jingtep bad ki jingri jingdup kumjuh ka jingtwa khyndew, ka jingkhyllem ki dieng, ka jingshlei um bad kiwei kiwei.
Katkum ka Meghalaya State Disaster Management Authority (MSDMA) ka la iathuh ba uwei rangbah ula duh noh ia ka jingim na ka jingtwa ka kynroh ha shnong Sutnga Weilong, ba hapoh ka Wapung C&RD Block ha East Jaintia Hills.
Ha ki ar sngi na ka jingjur slap bad eriong ki don 134 ngut ki nongshong shnong ki shah ktah ha ki 17 tylli ki shnong bad 29 tylli ki iing ki la shah pynjulor bad lai tylli ki skul.
Kat haduh ba thoh ia kane khubor ym pat ioh ia ka jingtip ba thikna hynrei la iathuh uwei ula iap bad 4 ngut ki mynsaw jur bad pynkit sha hospital ban ioh jingsumar.
Ka Meghalaya State Disaster Management Authority kala pyntip ba ka eriong erngit kala pynjulor ia kawei ka iing ha Mawthadraishan Block bad kala ktah ia katei ka shnong ha ka 27 tarik u Jymmang. Katba ha ka 28 tarik pat, ka eriong kala pynkhyllem ia ki dieng kiba la ban kylla ia ki post elektrik bad kawei ka iing kala julor malu mala na ka jingtwa khyndew ha shnong Nongkhlaw.
Kawei ka iing ka la shah pynjulor haka eriong ha ka shnong Mawten kaba hap ha Mawkyrwat Block jong ka South West Khasi Hills District ha ka 28 tarik u Jymmang.
Kala don ruh ka jingtwa khyndew ha ka 13TH KM MR Road kaba la ktah ia ki 4 tylli ki shnong jong ka jong ka South West Khasi Hills District bad kala don ka jingduh iaka bording elektrik naduh ka 26 tarik u Jymmang.
Ha East Khasi Hills kala don ka jingtwa khyndew ha Kenches Trace, hajan Rilbong Beat House, kala don ka jingtwa khyndew ha Mawlai Bypass ha kaba 4 ngut kila mynsaw bad la pynkit nohia ki sha NEIGRIHMS na ka bynta ban ioh ia ka jingsumar. Kala don ruh ka jingtwa khyndew ha surok ha Tyrsad kaba hap ha Mawphlang Block ba kane ka jingtwa kala pynlong syndon ban khanglad iaka leit ka wan na katei ka surok.
Ha South West Garo Hills, kala don ka jingkhie jong ka eriong ha ka 27 bad 28 tarik uJymmang ha kaba kala pynjulor iaki katto katne tylli ki iing bad pynkhyllem ruh ia ki post elektrik.
Ha South Garo Hills hynne ka sngi, kila don katto katne tylli ki dieng kiba la khyllem hynrei ym pat ioh ia ki jingtip halor kaj ingjulor jong kino kino ki iing, katba ha West Garo Hills ruh kala don ka jingkhyllem ki dieng hapoh Tura bad ka tnad jong ka PWD Road ka dnag ialeh ban weng ia kitei ki dieng katba ka tnad MeECL ka dang ialeh ban pynbiang biang ia ka bording elektrik ha kitei ki jaka kiba la shah ktah.
Ka Meghalaya State Disaster Management Authority kala pyntip ba ha East Garo Hills, kala don ka jingpom u pyrthat ha Rongrong Bolsongsok hapoh Songsak C&RD Block ha ka 26 tarik u Jymmang ha kaba ar tylli ki iing kila shah pynjulor bad kala ktah ia ki 6 ngut ki briew ha katei ka shnong. Kala don ruh ka jingkhyllem jong ki dieng, ki sainar elektrik ba katto katne tylli ki iing kila shah pynjulor.
Kawei ka skul bad 22 tylli ki iing kiba hap ha Kharkutta Block jong ka North Garo Hills kala shah pynjulor haka eriong ha ka 27 tarik u Jymmang bad kane ka jingjia kala ktah ia ki 125 ngut ki nongshong shnong ha ki 7 tylli ki shnong.
Nalor kane kala don ruh ka jingkhyllem jong ki dieng, ki sainar elektrik ba katto katne tylli ki iing kila shah pynjulor haka 28 tarik u Jymmang.
La pyntip ruh ba kawei ka skul bad 22 tylli ki iing kiba hap ha Kharkutta Block jong ka North Garo Hills kala shah pynjulor haka eriong ha ka 27 tarik u Jymmang bad kane ka jingjia kala ktah ia ki 125 ngut ki nongshong shnong ha ki 7 tylli ki shnong.
