Ïaroh ka Myntri ka Koit ka Khiah ia ka Civil Hospital Mawkyrwat kum ka Model Hospital

Ka Myntri jong ka tnat ka Koit ka Khiah, ka Dr. M. Ampareen Lyngdoh ka la hiar sha South West Khasi Hills District ha ka 7 tarik Nojprah ban wan ban jurip ia ka Civil Hospital Mawkyrwat ha kaba ka la pynlong ruh ia ka jingialang bad ki doktor, ki nos lem bad kiwei kiwei ki nongtrei.
Haba kren sha ki lad pathai khubor, ka kong Ampareen ka la pynpaw ia ka jingkmen ban iohi ba wat ha ka por kaba lyngkot kane ka hospital ka la lah ban ai ka jingshakri kaba biang bad pura sha ki paid nongshong shnong jong kane ka District. Ka la iaroh ruh ba hapoh ka jingialam jong u Dr.W Sutnga, Medical Superintendent la lah shisha ban iohi ia ka jingkylla stet hapoh kane ka hospital bad kumta ka la ai jingkynthoh ba ka Civil Hospital Mawkyrwat ka la dei ka Model Hospital hapoh ka Jylla.
Ka Kong Ampareen ka la pyntip ba ki don haduh kumba 79 tylli ki shnong ki bym lait kali ha kane ka dong ka thain bad namarkata ka sorkar ka la sngewdei ban rah ia ki Sub-Centres lane ki Health & Wellness Centres sha kiba kum kita ki jaka na ka bynta ban ai jingshakri ia u paidbah. Ka la iathuh ruh ba ka sorkar ka la don jingthmu ban pyntreikam ia ka Drone Technology na ka bynta ban rah ia ki dawai bad kiwei ki tiar sha ki jaka kiba shitom ban poi kali.
Ka la pynpaw ruh ia ka jingdonkam ban ai training ia ki nongpynkha khun (DAIs) bad ban siew dor ia ki .Haba pynpaw ia ka jingbynniaw ia ka jingshem jingeh halor ka jingduna ka jingshim tika jong ki khyllung, ka la kyrpad ia ka jingdonkam jong ka jingiatreilang jong ki kmie ki kpa jingiatreilang ryngkat ki ASHA. Namarkata ka la khot ia ki sengbhalang bad seng trei mon sngewbha ban ym peit tang ia ki jingduna hynrei ban wan shakhmat ban ai ka kti kamon ka kti ka diang ban iatreilang bad ka sorkar na ka bynta ban wanrah ia ka koit ka khiah ha kane ka thain.
Ka la pynpaw ia ka jingdonkam ban ai pisa bad pynstet wut wut ia ka jingpyntreikam ia ka Blood Bank unit jong kane ka hospital. Ha kajuh ka por ka la pynpaw ia ka jingdonkam ban donkam ban phai khmat sha ki jingpang bym iabit kiba long ki dawbah jong ka jingduh noh jong ki mynsiem kum ka High Blood Pressure, Diabetes, Cancer, Tuberculosis da kaba kyntu ia baroh ki nongtrei ban trei shitom bad ban ai ka jingshakri kaba bha na ka bynta ban kyntiew ia ka koit ka khiah bad ban wanrah ia ka roi ka par ha kane ka dong ka thain.
Ha kane ka jingleit jurip, la iadonlang ruh u Bah Renikton L. Tongkhar, MLA Mawkyrwat Constituency, kong Y.R. Mawlong, Additional Deputy Commissioner ka South West Khasi Hills District, Dr H.C. Lyndem, Director D.H.S (MI), Dr W. Sutnga, Medical Superintendent ka Civil Hospital Mawkyrwat, Dr. F.R. Lartang, District Medical & Health Officer bad kiwei kiwei.