Iaroh u Conrad ki jaka pynlang um ki kylla jaka jngohkai bad ri dohkha

Ka North Eastern-Space Applications Centre (NESAC) ka la ai jingiaroh ia ka Meghalaya, kum kawei ka Jylla kaba pyntreikam bha ha ka ban pyndonkam da ki Satellites ban peit ia ka jinglong jingman ka mei mariang. Ka Sorkar Jylla ka la shim jingiarap na ka NESAC ban tip halor ka jinglong jingman ka mei mariang khamtam haba ia dei bad ka jingdon ki Wah Duid. Lyngba ka jingiarap naka NESAC, ka Sorkar Jylla haduh mynta ka la shem ba ki don palat 59,000 tylli Wah Duid hapoh Meghalaya. Na ka liang u Myntri Rangbah ka Jylla u Conrad K Sangma haba pynpaw ka jingdonkam ban iada ia ki Wah Duid, ula ong ba ka Sorkar Jylla ha ki snem ba la dep ka la pyntreikam da ka Water Policy ki ban long ki kyndon ban ialam ia ka Sorkar, kumno ban iada bad pynneh ia ki Wah Duid bad tyllong um.

U Conrad ula ong ba ki don shibun ki jingeh haba iadei bad ki lad lynti ban shim naka bynta ban iada iaki Wah Duid bad dei namar kane ka Sorkar Jylla kala wanrah syndon daka Water Policy ban pyntrikam.“Lyngba ka Water Policy, ka Sorkar ha ryngkat bad ka jingiareilang bad ki bor shnong, mynta ka kynti ka la lah ban iada ia ki Wah Duid bad ki tyllong um, da kaba thung dieng bad tei ia ki Dam barit ban pynlang um khamtam ha ka por tlang” la ong u Conrad. Haba pynpaw ba ki Wah Duid ki long ka jingmyntoi ia ki nongshong shnong u Conrad ula ong “Dang shen ngi la wan plie ia ka jaka pyllang um hapoh ka shnong Mawkriah bad mynta kane ka shnong ka long ruh kum ka jaka jngohkai”.

U Conrad ula ong ba ka jaka pyllang um ha Mawkriah ka long ka jingmyntoi ia ki nongshong shnong namar wat ha ka por tlang ki paidbah ki pahuh ka um namar ka jingdon ka jaka pyllang um.“Ka jaka pyllang um ha Mawkriah ym tang ba ka la kylla ka jaka jngohkai pyrthei hynrei, ki nongshong shnong ki lah ruh ban ri Dohkha ka ban iarap ia ki nongshong shnong ha ka ioh ka kot bad ka kamai kajih” ula ong.