Ïasoi ka sorkar India, Assam bad ka ULFA ïa ka Memorandum of Settlement

Ha ka jingiadonlang u Myntri Kam Pohiing bad Myntri ka Tnat Cooperation jong ka Sorkar Pdeng, u Amit Shah, la iasoi ia ka Memorandum of Settlement hapdeng ka Sorkar India, Sorkar Assam bad ki dkhot jong United Liberation Front of Assam (ULFA), ha New Delhi, mynta ka sngi.

Ka jingiateh soskular k along u mawmer ba kongsan ban pynurlong ia ka thong jong u Myntri Rangbah duh, u Narendra Modi ia ka thain shatei lammihngi kaba shongsuk shongsain, kaba jop bad kaba lait na ki kam pyntriem bad wanrah ka shongsuk shongsain, ka jingjop ba shirta bad ka roi ka par ha Assam. U Myntri Rangbah jong ka jylla Assam, u Dr. Himanta Biswa Sarma bad ki heh ophisar jong ka Tnat Kam Pohiing jong ka Sorkar Pdeng bad Sorkar Assam ki la iadonlang ha ka jingsoi ia ka MoU.

Ha kane ka jingialang, u Amit Shah u la ong ba mynta ka sngi kadei ka sngi kaba kyrpang ia ka Assam haba ka shongsuk shongsain kan don ha ka thain shatei lammihngi bad ha Assam, kiba la mad ia ka jingiaumsnam la slem bha. U la ong hadien ba u Narendra Modi u la long u Myntri Rangbah duh ha u snem 2014, u la shim ia ki sienjam ban jam ia ki jingiapher hapdeng ka Delhi bad ka thain shatei lammihngi bad la sdang ia ki jingiakren bad baroh.

U Shah u la ong hapoh ka jingialam jong u Myntri Rangbah duh u Modi, ka Tnat Kam Pohiing ka la trei na ka bynta ka thong ia ka thain shatei lammihngi, kaba lait na ki kam pyntriem bad ki jingiaumsnam. U la ong ba ha ki 5 snem ba la leit, la iasoi 9 tylli ki jingiateh soskular ba iadei bad ka shongsuk shongsain bad u pud u sam bad ki jylla bapher bapher jong ka thain shatei lammihngi, kine ki la wanrah ia ka shongsuk shongsain ha bun ki bynta jong ka thain shatei lammihngi

U Myntri Kam Pohiing jong ka Sorkar Pdeng u la ong ba ki don palat 9000 ngut ki dkhot kiba la wan pyndem bad la weng ia ka Armed Forces Special Powers Act (AFSPA) na 85 percent ka jaka ha Assam. U la ong namar kane ka Soskular kaba la iasoi mynta ka sngi hapdeng ka Sorkar India, ka Sorkar Assam bad ka ULFA, ka Sorkar Modi ka la kot sha ka jingjop ban weng ia baroh ki kynhun pyntriem ha Assam.

U la ong ba ka soskular kaba mynta ka sngi kadei kaba kongsan bha na ka bynta ka shongsuk shongsain ha Assam bad ka thain shatei lammihng baroh kawei. U la ong ba hapoh ka soskular kaba mynta ka sngi, ki dkhot jong ka ULFA ki la mynjur ban kyntait ia ka lynti jong ka jingaumsnam, ban aiti baroh ki tiar ialeh jong ki bad ki la pynsangeh noh ia ki kynhun iakhun jong ki. Nalor kane, ka ULFA ka la mynjur ruh ban weng noh baroh ki ktem ba sah ki dkhot jong ka, ban iashim bynta ha ka synshar paidbah kaba don nongrim ha ka ain bad ban iada ia ka jingtylli jong ka ri.

U Amit Shah u la ong ba ha ka jingiakhun bad ka ULFA, kumba 10 hajar ngut ki briew na baroh arliang ki la duh ia la ka jingim, kiba dei ki nongshong shnong jong kane ka ri, hynrei mynta ka sngi la lah ban pynbeit shisyndon ia kane ka jingeh. U la ong ba ka Sorkar India ka la mynjur ban ai jingiarap bad shibun ki projek na ka bynta ka roi ka par jong ka jylla Assam. U la ong ba ka sorkar Modi kan bud baroh ki kyndon jong ka jingiateh soskular.

U Shah u la ong ba hadien ba la wan ka sorkar Modi ha u snem 2014 ki jingjia iaumsnam ha Assam ki la duna da 87%, ki jingiap da 90% bad ki jingjia rahbor da 84%. U la ong haduh mynta 7500 ngut ki dkhot ki la wan pyndem tang ha Assam, ka ban don shuh shuh sa 750 ngut mynta ka sngi, kumta ka jingwan pyndem jong palat 8200 ngut ki dkhot tang ha Assam kadei ka jingsdang jong ka juk ba thymmai jong ka shongsuk shongsain.

U Myntri Kam Pohiing jong ka Sorkar Pdeng u la ong ba ka sorkar Modi ka la iasoi ia ka jingiateh soskular bad ka NLFT ha u snem 2019, Bru bad Bodo ha u snem 2020, Karbi ha u snem 2021, ka soskular bad ki Adivasi ha u snem 2022, ka soskular ba iadei bad u pud u sam hapdeng ka Assam- Meghalaya, ka soskular ba iadei bad u pud u sam hapdeng ka Assam- Arunachal Pradesh bad ka soskular bad ka UNLF ha u 2023 bad mynta ka sngi bad ka ULFA. U la ong ba lyngba kane ka jingiateh soskular kaba mynta ka sngi, ka la sdang ka por ba thymmai jong ka shongsuk shongsain na ka bynta ka thain shatei lammihngi khamtam ka jylla Assam.

U Amit Shah u la ong ba ka Tnat Kam Pohiing, Sorkar India kaba la buh da ka por ban pynurlong ia ki jingdawa jong ka ULFA bad yn thung ruh ia ka committee na ka bynta ka jingpeitngor ia ka. U la ong ba ha baroh ki jingiateh soskular ba la iasoi hadien u snem 2019, ka sorkar Modi ka la trei borbah bad la shim ia ki sienjam ban pynurlong ia baroh ki kyndon.

U Myntri Kam Pohiing u la ong ba kane kan nym urlong khlem ka jingiohi jngai jong u Myntri Rangbah duh u Modi ia ka thain shatei lammihngi kaba lait na ki kam pyntriem.