Ka skulbah North-Eastern Hill University (NEHU), Shillong ka la soi ia ka Memorandum of Understanding (MoU) bad ka Pt. Ravishankar Shukla University (PRSU), Raipur hynne ka sngi rakhe lyngkhuh snem ka PRSU na bynta ban ka jingïatreilang ha ka pule puthi bad ka jingpynroi ïa ki jingwad bniah. Ia ka jingialang la pyniaid da u Ramen Deka, u Lat ka jylla ka Chhattisgarh, bad la iaroh ia ka jingiateh kular hapdeng kine ki skulbah ban iatreilang na bynta ban kyntiew ia ka pule ha ka thain shatei lammihngi jong ka ri India. Haba kren kum u kongsan, u Lat ula pynpaw ka jingiatreilang ha ka liang ka jingpule ka kham khraw, da kaba ong, “Ki jingiatreilang ki dei ka dak jong ka jingwad bniah bad ki jingpule kiba kham shalor.
Ha ka pyrthei ka jingpule ba bun jait, ka skulbah kam lah ban ieng marwei bad ban pynlong ia ki jingwad bniah khlem da iatreilang bad kiwei pat ki jaka pule kiba kham halor. Kane ka MoU kan long ka jingkieng hapdeng ka thaiñ shatei lammihngi bad ka ri India baroh kawei, kaba ai ïa ka jingïasam jingtip, ka kolshor, bad ki lad jingïarap ki ban ai jingmyntoi ïa ki samla pule bad ki nonghikai na baroh ar tylli ki jaka pule.”Ia ka MoU la iasoi da u Prof. Prabha Shankar Shukla, Vice-Chancellor jong ka NEHU, bad u Prof. K.N. Pani, Vice-Chancellor ka PRSU halor ka jingthmu ban kyntiew ia ka pule puthi bad ki kam wad bniah.
Kane ka jingiateh ka dei ka jingsdang ka jingiatreilang ba thymmai ha ka liang ka jingpule hapdeng kine ki ar tylli ki skulbah. Haba kren ha kane ka jingïalang, u Prof. Prabha Shankar Shukla ula ong, “Kane ka jingïateh kular ka long kham palat ban ïa ka kot-ka dei ka jingthmu ba ïasam lang jong ka jingïatreilang, ka jingroi, bad ka jingwad ïa ka jingtbit ha ka pule puthi bad ka jingwad bniah. Ka jingïar jong kane ka MoU ka pynpaw ïa ka mynsiem ba shisha jong ka pule puthi da kaba plie ïa ki jingkhang thymmai na ka bynta baroh ar tylli ki jaka pule ban ïatreilang, kaba pynïar ïa ka jingïohi jngai na ka bynta ki samla pule bad ki nonghikai jong ngi.”
