U Myntri Sorkar u ba dei ruh u Nongialam ka National People’s Party u Rakkam Sangma u kubur ba ka election MP Lok Sabha ha Tura Parliamentary constituency ka dei kaba iatan tyllai bha hapdeng ka NPP bad ka Congress. Haba iakren bad ki lad pathai khubor, u Rakkam ula ong “Ka ilekshon ka long kaba itynnad bad ka bym poi pyrkhat ha kane ka kynti ba mynta kan don ka jingiatan tyllai”. U Rakkam ula ong ba lada ki nongtrei ka Meghalaya Bharatiya Janata Party (BJP) ki kyrshan shisha ia ka NPP kumba bthah da ka High Command, ka NPP thikna kan poi sha ka jingjop hynrei haba kut hap ap ia ka 4 tarik Jylliew 2024.
Hynrei ula bynrap pat ba ka jingiakhun ka iakhaid bad ka Tura seat ka lah ban leit shano shano. Ka NPP ka kyndit kat kum ka jingiakhein jingkhein namar ka Congress kala paw ba ka la leh bha ha Tura. U Rakkam haba pynpaw ia ka jingsngewskhem ba ka NPP kan jop salit na Tura seat haba pynpaw ba ki don shibun kiei kiei kiba iaid pyrshah ia ka party. Haba phai pat sha Shillong seat, u kyrmen ba ki nongthep vote ki ai vote sha ka NPP bad kitbok kitrwiang ba ka kyrtong kan jop.
“Watla ha nga ka Shillong seat ka dei kaba kordor bad ki nongthep vote ki tip bha iano ba kin jied namar ka Meghalaya ka dei ka Jylla ka bym don eiei satia. Mano mano ba wan ha ka bor lane long MP, ka Meghalaya ka lah ban pyniaid ia ka synshar khadar da ka jingleh isynei jong ka Sorkar Pdeng” ong u Rakkam.
