U MLA ka seng Congress na Mylliem u Bah Ronnie V Lyngdoh hynne ka sngi ula iehnoh ia ka shuki kum u nongialam liang pyrshah ha ka iing dorbar thawaiñ ka Jylla. U Bah Ronnie ula phah ia ka shithi iehnoh sha u Lamphang ka iing dorbar thawaiñ u Thomas A Sangma ha kaba u Lamphang ula pdiang ia kane ka shithi iehnoh kam. Kum ban shu pynkynmaw hadien ka ilekshon MLA 2023 ka seng Congress bad TMC ki la jop mar 5 ngut ki MLA ha ka iing dorbar thawaiñ ba 60 ngut ki dkhot hynrei u Bah RV Lyngdoh ula shah thungkum u Nongialam ka Liang Pyrshah.
Hynrei ha ka ilekshon MP u Saleng A Sangma u MLA ka Congress na Gambegre ula jop ia ka ilekshon MP Lok Sabha na Tura bad ula iehnoh ia ka kam MLA bad ka seng Congress ka la don sa tang 4 ngut ki MLA. Hadien kane ka sain hiam ha jylla ka la kylla kynsan ha kaba 3 ngut ki MLA ka Congress kynthup u Dr C. Lyngdoh, u Bah Gabriel Wahlang bad u Bah Charles Marngar ki la phet noh na ka Congress bad leit pyniasoh bad ka seng NPP bad u Bah RV Lyngdoh ula sah tang marwei kum u MLA ka Congress ha ka iing dorbar.
Kumba long mynta ka Liang Pyrshah ha iing Dorbar ka don 10 ngut ki MLA kynthup 5 ngut na ka AITC, 4 ngut ka VPP bad 1 na Congress. Kawei pat tyllong khubor ka iathuh ba u Dr Mukul Sangma Myntri rangbah barim ka Jylla u lah ban shah jied kum u nongialam liang pyrshah ha ka iing dorbar thawain namar u don 5 ngut ki MLA na ka seng AITC.
