Hadien ba ka KSU Langkynma Area Unit mynne mynstep ka la ioh ban bat ia ki 12 ngut ki suba khar Bangladesh na ka thain Nongjri-Nonghyllam, kaba hap hapoh Ranikor Civil Sub-Division, kiba la suba jur ba ki wan kiew na ki thain Sunamganj District jong ka Bangladesh, ka KSU South West Khasi Hills District mynta ka la kynthoh jur ia ki shipai iada khappud (BSF) halor ka jingioh lad jong ki briew na shiliang khappud ban rung ban mih katba mon hapoh u pud u sam jong ka India. Ka KSU South West Khasi Hills District hapoh ka jingialam u President, u samla Forwardman Nongrem mynta ka sngi ka la iakynduh ia u Deputy Commissioner, u Bah Barnari Mawlong ha kaba ka la pynpaw ia ka jingsngewkhia halor ka jingwan rung kyrthep jong ki briew na Bangladesh kiba wan rung be-aiñ sha ki jaka India ha shilynter ka khappud India bad Bangladesh ha South West Khasi Hills District da ka jingthmu ban wan buhai shnong. Kumta, ka KSU ka pynrem jur ia ka jingbym treikam bad jingbym shimkhia jong ki
shipai BSF, kiba dei ban pahara ia u pud u sam jong ka ri India, kiba mynta ki kham pynleit jingmut pynban kumno ban ioh pyndik ia ki trai shnong da kaba wan kiew shaduh ki shnong briew bad ki klet pat ban peitngor ha ki jaka khappud. Ka KSU ka la kynthoh jur ruh ba ka jingiohlad jong kine ki briew na Bangladesh ban wan kiew katba mon sha India kadei lyngba ka jingdon jong ki dalal napoh India, kiba la ialam lynti ia ki ban wan kiew sha India, bad ia kata lah ban sngewthuh namar ba ha ka jingtohkit da ki dkhot ka KSU, kine ki khar Bangla ki iathuh shai ba kim tip shuh ia ka lynti ban leit phai pat. Kumta, ka KSU ka la dawa na ki bor pyniaid District ba kidei ban pynlong ia ka jingtohkit kaba bniah bad ban kem mardor ia kitei ki dalal, kiba long ka lynti ia ki khar Bangla ban wan rung sha India.
Ha kane ka jingiakren bad u DC, ka KSU ka la kren shai ruh ba u ‘khar Bangla u sah hi u khar Bangla, kata, la kidei na ka niam Hindu, Muslim ne Khristan ruh, dei ban pynphai pat ne pynshitom katkum ka ain’. Kumta, halor kane ka jingiohlad laitluid ki khar Bangla ban wan sha India, ka KSU ka la dawa na u DC ba udei ban pynlong jingialang hapdeng ki bor pyniaid District, ki BSF, ki sengbhalang bad ki khlieh shnong jong baroh ki shnong kiba don hapoh thain khappud khnang ba yn lah ban tehlakam ia kane ka jingma, kaba ap ia ki trai ri trai muluk.
