U Nongshna phlim na rilum Garo u Dominic Sangma ula ioh ia ka khusnam Best Director Critic Choice Award na ka bynta ka phlim jong u ‘Rapture’ (Rimdogittanga) ha ka Indian Film Festival Melbourne, Australia kaba la long ha ka 15 tarik haduh ka 25 tarik u Nailar. Ka phlim “Rapture” ka la pynshoh biej ia ki nongpeitkai ha kaba la pyni ia ka jingïaid lynti ha ki bynta jong ki lum Garo ha jylla Meghalaya, kaba don jingïa dei ba jylliew ia ka jinglong ba sngewrit bad ka jingshah shitom hapoh ka shnong kaba don ha nongkyndong.
Ka Rapture, ka dei ka phlim ha ka ktien Garo, ka dei halor uwei u khynnah shynrang uba dang 10 snem ka rta uba ialeh pyrshah ia ka jingpang bym lah ban iohi ha ka por miet bad ula mad ia ka jingeh ba khraw namar ka jingshyrkhei jong ki kam rahbor ia ki khynnah.Ia kane ka phlim la pyni nyngkong ha u Lber 2024 ha ki 100 tylli ki jaka pyni phlim ha kylleng ka Ri France bad ia kane ka phlim mynta, dang pyni ha Tura bad yn pyni haduh ka 25 tarik u Nailar.
Ka phlim u Dominic Sangma ba la tip kum ka ‘MA.AMA’ ka la long ka phlim Garo ba nyngkong eh ban ioh ia ka National Award bad ka la ioh ia ka khusnam Best Cinematography Award ha ka 22nd Shanghai International Film Festival ha u snem 2019 bad ka la ioh ruh ia ka khusnam Best Film ha ka 14th International Film Festival ha Thrissur.
Ka phlim ‘Rapture’ ka dei ka phlim ka baar ba la pynmih da u Dominic Sangma bad ka la ioh khur ia ki khusnam ha ki rynsan Film Festival kynthup ia ka khusnam Best Cultural Diversity ha ka Asian Pacific Screen Awards ha Brisbane, Australia, ka la ioh ia ka NETPAC Award ha MAMI, Mumbai, ka la ioh ruh ia ka ‘Honorable Mention Award’ ha ka Indian Film Festival ha Los Angeles.
