Ka NEHU, Tura Campus bad Community College jong ka NEHU Wahiajer ba tip kum ka Deen Dayal Upadhaya Community College for Skill Development, Wahiajer ryngkat ka jingiatreilang ka ICAR-IIHR, Bengaluru ha ka 25 tarik ka sngi saitjaiñ ka la pynlong ia ka jingai jinghikai ba kyrpang na ka bynta ki nongrep ka Rilum Jaiñtia ba tip kum ka “Capacity Building Programme ICAR-IIHR Technologies for Production of Horticultural Crops in NEH Region”.
Ha ka jingialang ai jinghikai ia ki nongrep ba la pynlong ha NEHU-DDUCC for Skill Development, Wahiajer la ioh ka jingkren pdiang na ka Prof. S.M. Sungoh, Principal DDUCC, u Prof. S.K.Singh, DDC Horticultural Sciences, ICAR ula long kum u kongsan, u Dr. Prakash Patil Director ICAR-IIHR kum u symbud kongsan, ryngkat ka jingdonlang u Prof. D. Walia, Dean, SHEES, NEHU Shillong, u M.B. Tongper, ADC, West Jaiñtia Hills District, u Prof. P.S. Shukla, Hon’ble Vice-Chancellor, NEHU, u Prof. C P. Suresh, Organising Secretary, NEHU, Tura, u Wolnish Rymbai, College Programme Coordinator, DDUCC, u waheh shnong Wahiajer, u Sanwotki Laloo, ki samla pule ka NEHU-DDUCC, ki paid nongrep bad kiwei.
La wan ban batai bniah halor ka buit rep katkum ka jingkylla ka juk khnang ba kan long kaba pynmyntoi iaki nongrep da u Dr. T. Sakthivel, Principal Scientist, IIHR and Nodal Officer, NEH Plan, ICAR-IIHR, uba la iathuh ruh ia ki jait dawai ban ai jingiada ia ki mar rep ba un miat un bha bad lait na ka jingshah bam khñiang.
Na ka liang u kongsan, u Prof. S.K. Singh, DDC Horticultural Sciences, ICAR haba kren u ong ba un sa wad bun ki lad ki lynti na ka bynta ban pynkiew ia ka rep ka riang ha ki bynta nyngkyndong ka thaiñ mihngi khnang ban ioh bor ioh mynsiem ki nongrep ka thaiñ.
U iaroh ruh ia ka jingtrei shitom ki nongrep ban pynbiang marbam, nalor ba u pynsngew halor ka jingdonkam ka rukom rep da ki sboh rymew ba wat na ka liang ka sorkar ruh ka la pynshlur bha ia ki nongrep ban leh ia kane.
Haba kyntu ia ki nongrep ban long kiba iatreilang, u ong kumba ka sorkar ka la don ia ka thong ban pynkiew ia ka kam rep ha kane ka thaiñ, u khmih lynti ruh ba ka Meghalaya kan sa long kaba hakhmat eh ban lah pynmih iaki jhur.
Ha kane ka sngi la don ruh ka bynta ia phylliew jingmut ki paid nongrep bad ki Scientist ha ka jingiadei bad ka jinglap jingshem jong ki lyngba ki jingthung ba kila rep.
Nalor ki jinghikai, ha kane ka sngi ki nongrep kila ioh ruh ia ki dawai ban ai jingiada ia ki jingthung kumjuh ki la ioh lang ruh ia ki symbai jhur.
