Ïoh jingithuh ka Bethany Hospital na ka CAHO, India

Ka Bethany Hospital, Shillong kala ioh ia ka jingithuh kum ka Centre for Quality Promotion na ka Consortium of Accredited Healthcare Organisation (CAHO), India ha ka International Healthcare Conclave kaba long ha Kolkata. Ia katei ka International Healthcare Conclave la plie da u Lat ka Jylla West Bengal Dr CB Anada Bose ha kaba la idonlang ki riewpawkhmat ha ka koit ka khiah hapoh ka Ri bad ka pyrthei kiba kynthup ia u Kresimir Antonio Paliska, Senior Vice-President bad CEO, AACI America, Dr Joel A Roos Vice President, Joint Commission International (JCI), u Manvir Victor Board Member – Global Advisory Group ka World Health Organisation, Dr Shin Ushiro u Executive Board Member, Japan Council for Quality Health Care (JQ), Dr M A Kadar Marikar CEO barim jongka Malaysian Society for Quality in Healthcare bad kiwei kiwei.

Kane ka jingioh jingithuh ka Bethany Hospital kadei kaba nyngkong ha ka thaiñ shatei lammihngi bad kaba 37 ha ka ri halor ka jinglah ka jongka ban ai ka jingsumar kaba bha tam bad ka jingshngaiñ ia ki nongpang. U Dr. Kyntiewlang Sanmiet uba long u Quality Manager & Nongaiktien jong ka Bethany Hospital ula ong, ba ka long ka burom kaba khraw ia ka Bethany Hospital ban ioh ia ka jingithuh na ka CAHO kum ka Centre for Quality Promotion bad ka jingaiti bad ka jingtrei shitom met bad mynsiem ban ai ka jingsumar kaba paka bad ka jingshngaiñ ia ki nongpang kidei ki mawnongrim ha ka rukom treikam jong ka hospital.

Ula ong, ba kane ka jingithuh ka long kum ka sakhi ia ka jingaiti ba khlem sangeh ha ka jingai jingsumar sukher bad ban ai ka jingkoit jingkhiah ia ki nongpang. Kum ka Centre for Quality Promotion, ka Bethany Hospital ka iaid ha ka mishon ban ialap bad ban pyntreikam ia ki kyndon kiba la buh da ka National Accreditation Board of Hospital & Healthcare Provider (NABH) bad ka National Accreditation Body for Testing and Calibration Laboratories (NABL) hapoh ka thaiñ.