U MLA ka nongpoh konstituensi bah Mayralborn Syiem, myn ha ka 31 tarik Nailar, 2024 u la leit sha ki ar tylli ki shnong kiba don hapoh ka Nongpoh Konstituensi na ka bynta ban pynpoi ïa ki kam pynroi lyngba ka skim MLA kaba la tip ka Special Rural Work Program (SRWP) 2023-2024 na ka bynta ka jing pynbit pynbiang ïaki jingdonkam jong kitei shnong. Kitei ki artylli ki shnong kiba la ïoh ban pdiang ïaki kam pynroi naka SRWP Skim ki kynthup ïaka Shnong Kbet Nongbri bad ka Shnong Umsaw Nongbri. U MLA la Nongpoh Bah Mayralborn Syiem ha kaba nyngkong u la leit ban Ïa kynduh ïaki Khlieh Shynshar shnong jong ka Kbet Nongbri hakaba u la ïoh ban leit jurip ruh ïaka jingpyntrei ïaka Madan kaba dang don hapdeng ka jingpynbit pynbiang naka bynta ka jingpdiang ïaka Jingïaseng Synod Samla ha katei la shnong ka ban sa long ha u snem 2026. Ha ka jingïalang kaba lyngkot kaba la long ha Kbet Nongbri, u bah Mayralborn Syiem u la ïoh ban aiti ïaka Work Order kaba 2 lakh tyngka naka bynta ban shna Kynroh jong ka Ïingmane bad 50 hajar tyngka naka bynta ban Shna pynbha ïaka ïing jong ka CE Society Balang Presbyterian Kbet Nongbri.
Hadien katei ka jingïalang, U MLA ka Nongpoh u la leit pat ban Ïa kynduh ïaki Nongïalam Shnong, ki Nongïalam jong ki samla bad ïaki Nongshong Shnong ka Umsaw Nongbri bad lyngba ka Jingïalang kaba lyngkot kaba la long ha katei kajuh ka sngi, u la ïoh ban aiti pat ïaka Work Order kaba 1 lakh tyngka naka bynta ban thied ki tiar pynsawa bad 5 lakh tyngka naka bynta ban tei pynheh ïaka Auditorium Hall jong ka Shnong Umsaw Nongbri. Haba kren ha kitei ki artylli ki Shnong naka liang u Bah Mayralborn Syiem kum u nongmihkhmat, u la kyntu Ïa baroh kiba la ïoh ban pdiang ïaki Work Order ba kin trei bha Ïa ka kam katkum ka jingthmu ba la ai haki, hakaba u la pyntip ruh ba naka liang ka Block Ophis ka la pyrkhing bha ïaki rukom pyntrei ïaki kam khnang ba ki kam kin ïaid beit ïaid ryntih khlem ki jingthud bad ruh ba kin dep ha kapor kaba biang.
U Bah Mayralborn u la ong ruh ba kane jingai jong u kan nym pat lah ban pyndap ïaki jingdonkam kiba bun jong ka Shnong, hynrei lyngba ki jingïatrei lang suki suki ngin sa lah ban pyndep ïaki kam ba la thmu daka Shnong. Shuh shuh u la ong, kine ki Shnong ki dang donkam shibun ki lad jingïarap kum ka Surok kaba biang, ka bor dieng elektrik bad ka umbam umdih hakaba naka liang jong u kum u nongmihkhmat un sa nang treishitom ban buddien Ïa kine ki kam bad suki suki yn sa lah ban pynurlong ruh Ïa kine ki kam katkum ki jingangnud jong ki paidbah.
