Ka Wapung Secondary School Wapung, East Jaiñtia Hills District kaba la seng daka Dorbar shnong naduh u snem 1978 halor ka nongrim ban kyntiew iaka pule puthi iaki nongshong shnong kumjuh ki shnong ba marjan kiba wan naka longïing ba duna ka ioh ka kot, mynta ka kynti kala ioh ban long kum ka Centre thoh Exam Matric MBOSE ka ban sdang naduh u snem 2025, bad ki skul ban hap hapoh kane ka centre kynthup ka Sohkymphor Secondary School, ka Tia Chaphrang Secondary School Sohkymphor, ka Step by Step Secondary School Wapung, ka Mookhep Secondary School bad kane hi ka skul Wapung Secondary School Wapung. Kumta kum ka dak jongka jingkmen halor ka jingioh centre hynne ka 15/10/2024 kane ka skul kala plie ia u maw sahnam, bad la wan ban plie da u MDC ka thaiñ u Phasmon Dkhar, ryngkat ka jingdonlang u Aditya Verma, IAS, SDO, Khliehriat, u O.Sumer SDSEO East Jaiñtia Hills District, ka Melody War napoh ka District Legal Services Authority East Jaiñtia, ki khynnah skul, ki nonghikai na ki san tylli ki skul, ki longkmie longkpa nalor kiwei pat.U waheh shnong Wapung Skur u Posting Dkhar haba iathuh iaka jingiaid lynti ka shnong ryngkat bad ka SMC naka bynta ban ioh ia kane ka centre, u iathuh ba iaki jingduna haba iadei bad ki jingtei jingshna shwa ban pdiang ia kane ka skul kum ka Centre thoh Exam Matric la pynbit pynbiang daka Dorbar Shnong kumjuh u MDC ka thaiñ u Phasmon Dkhar lem bad u Kpa jong u. U O.Sumer SDSEO East Jaiñtia Hills District haba kren u kyntu iaka Wapung Secondary School ba kam dei ban shim kabu ia kiwei pat ki skul lyngba ka jingioh centre, hynrei dei ban iatreilang ryngkat kumjuh kiwei pat ki skul ruh ki dei ban iatreilang.
U Aditya Verma IAS, SDO Khliehriat kum u symbud kongsan haba kyntu kynpham iaki khynnah skul u ong, phi lah ban jied kaei ba phi kwah ban long haka jingim, hynrei kaba donkam eh pyrkhat shwa bad sa shim iaka rai ba biang tam hadien kata sa trei shitom naduh mynsiem bad shaniah ruh halade, namar ymdon duk ne riewspah balah ban khanglad haba don iaka jingthrang jingangnud. Bad kiei kiei ki jingtyngkhuh haka jingim ki long donkam khnang ban long kiba khlaiñ bor ban jop iaka thong. U Phasmon Dkhar haba kren u ong ka jingioh ia kane ka Centre kan pynsuk iaki skul jong ki shnong ba marjan kiba juh leit thoh matrix mynshwa shaduh Khliehriat bad Tuber, ha kaba don ki por nalor ba jngai ki ju mad iaka dheng kali bad poi slem shaki centre thoh exam. Haba iadei bad ka jingiaid lynti naka bynta ban ioh ia kane ka centre u Phasmon Dkhar u ong ba don hi ki jingthut jingeh hynrei daka jingdon bynta lang u myntri ka tnat pule puthi ka sorkar Jylla la lah ban weng iaki jingeh bad ioh ia kane ka centre. Kumta u ngeit skhem kane ka centre kan lah ban pynmih shibun ki riewstad riewshemphang ki ban rahnam iaka district ka Jylla ymtang haka pule puthi hynrei haki bynta bapher bapher kiba iaid lang ryngkat ryngkat bad ka pule puthi.
Kiwei pat ba kren kynthup ka Melody War napoh ka district legal services authority, Khliehriat kaba la shim kabu ruh ban pynsngewthuh halor ka juvenile justice Act, kaba dei ka aiñ ba ai jingiada iaki khynnah ba hapoh 18 snem ka rta, kumjuh ruh halor ka aiñ POCSO, ka Kyntilang Dkhar Headmistress Wapung Secondary School bad kiwei. Ha kane ka sngi ka skul Wapung Secondary School kala pynkup burom ruh iaki 44 ngut ki khynnah bala pass iaka examine SSLC jong u snem 2024.
