Ki pulit ka jylla ha ka sngi Balang ki la ioh kem ia kawei ka longkmie ba donkti die drok bad la ioh kurup 10 gram duna u drok. Ha ka jingkhynra ka kynhun Anti Narcotics Task Force (ANTF) jong ka East Khasi Hills, ryngkat ki pulit ki Lumdiengjri Police Station bad ka Jhalupara Outpost ki la ioh kem ia ka Aisha Khatoon 50 snem ka rta na Jhalupara.
U Superintendent of Police u Bah S Nongtnger ula pyntip ba ia ka Aisha Khatoon ba ju khot sin da ka ‘Pahari’ bad ka shong ka sah ha Lower Paltan Bazaar. Ula iathuh ba ki pulit kila ioh kurup 73 tylli ki klong rit ba thep ia u drok uba don 9.72 gram, 4 tylli ki mobile phone bad ka pisa kaba T. 27410.
U SP ula pyntip ruh ba la register case ia kane ka briew ha Lumdiengjri Police Station hapoh ki kyndon ka NDPS bad ka jingtohkit mynta kan dang iaid shakhmat.
