Ïoh khusnam ‘Excellence Journalism Award’ ka Princess bad ka song T.1 Lak

Ka nongpathai khubor ka jylla ka Samla Princess Giri Rashir ka la ioh pdiang ia ka khusnam Excellence in Journalism Award ryngkat bad ka song pisa T.1 Lak hynne ka sngi ha ka jingialang kaba la long ha Nongbah Delhi. Ia katei ka khusnam la ai da ka Ramnath Goenka Foundation na ka bynta ki Print, Digital bad Broadcast Journalist ha ka Ri, kiba la trei kum ka nongthoh khubor halor ki mat bapher bapher.

Ka samla Princess Rashir ka trei ha East Mojo, ka la ioh pdiang ia ka khusnam na ka liang ki nongpathai khubor (Broadcast) ha ka kyrdan Environment Science and Technology halor ka Documentary “Choking amid Coking: Meghalaya Coke Factories Leave No Room To Breathe” kaba dei ka khubor kaba la tih bniah halor ka jingshah ktah ka mariang bad ka jingkylla ka suiñbeng na ka jingmih bun tylli ki karkhana Coke kiba la tei be-aiñ ha East Jaintia Hills bad ha West Khasi Hills jong ka jylla Meghalaya.

Ki la don bun ngut ki nongthoh bad ki nongpathai khubor kiba la ioh pdiang ia ki khusnam ha ki kyrdan bapher bad la sam ia kitei ki khusnam da u Myntri ka Sorkar Pdeng uba khmih ia ka Ministry of Roads, Transport and Highway u Nitin Gadkari ha ryngkat ka jingdon lang ki nongthoh bad ki nongpathai khubor kiba pawnam ha ka Ri.