Ka Kong Silbi Passah ka la ioh ia ka khusnam Padma Shri na ka President jong ka ri India ka Droupadi Murmu ha ka jingialang kaba la long hynne ka sngi ha Rashtrapati Bhavan, New Delhi. Ka Kong Silbi Passah ka dei ka longkmie Khasi ba shong basah ha Riatsamthiah bad ka la trei shitom ban kyntiew ia ka rwai bad ka shad tynrai Khasi bad ha u snem u ba la dep ka la ioh pdiang ia ka Sangeet Natak Akademi Award na ka President ka ri ka Droupadi Murmu. I Kong Silbi Passah ym tang ba ila noh synniang ha ka tem ka put, ka rwai ka shad tynrai, hynrei ila shongthait ruh kum ka nonghikai Hindi bad i dei ruh i riewshemphang jong ka SSA bad DERT bad ila noh synniang ha ka liang ka pule puthi ha ka jylla bad khamtam ban kyntiew ha ka jingpyndonkam ia ka ktien Hindi.
Lah ban ong, man u snem la ju sam ia ka Padma Award kaba dei ka khusnam kaba heh tam ia ki nongshong shnong ha ka ri India bad ia kane ka khusnam la phiah ha ki 3 bynta kynthup ia ka Padma Vibhushan, Padma Bhushan bad Padma Shri. Ka long ka jingsngewarong ia ka jaidbynriew bad ia ka jylla Meghalaya baroh kawei, haba i Kong Silbi Passah ila riam la beit da ki jaiñ tynrai ban shimti ia katei ka khusnam na ka President ka ri. Na ka liang u Myntri Rangbah ka jylla u Conrad K Sangma lyngba ka X, ula ai khublei ia ka Kong Passah halor ka jingioh pdiang ia katei ka khusnam kaba pyni ruh ba ka jylla Meghalaya ka dei kaba riewspah ha ka tem bad rwai tynrai.
Kym ban pynkynmaw i Kong Passah ila ioh ia ka khusnam District Certificate of Honour na ka Sorkar Jylla ha u 2001, khusnam Seng Khasi, Seng Kmie Honorary Award (2008); khusnam State award (2005); khusnam People’s Choice Award NETV (2005); khusnam National Award for teachers (2006); khusnam Jeebon Roy Award (2008); khusnam Khasi Jaintia Welfare Award (2009); khusnam International Gold Star Award (Bangkok 2010); khusnam Seng Samla Seng Kmie Honorary Award (2011); khusnam Lady of Hope (Cape Town South Africa) (2012); khusnam U Tirot Sing Award for Art and Literature (Meghalaya 2014); khusnam Youth Affair Award (2019); khusnam 4th Northeast Unsung Heroes red carpet social award (2021) bad khusnam SangeetNatak Academic Award (2021).
