Ka President ka Ri India, ka Droupadi Murmu ka la sam ïa ki khusnam ‘National Awards’ sha ki nonghikai na kylleng ka Ri ha ka jingïalang kaba la long ha Nongbah New Delhi. Ia ka khusnam ‘National Award’ na ka bynta ki Nonghikai la sam ha ka sngi rakhe ia ka sngi kyrpang ki Nonghikai kata ka ‘Teacher’s Day’. Na ka liang ka Jylla Meghalaya u Bah Everlasting Pyngrope u Principal ka Myngken Christian Higher Secondary School Ri-Bhoi district u dei uwei napdeng ki Nonghikai ka Ri India uba la shah pynkup burom da ka President ka Ri da ka ‘National Teachers’ Award’. Ka jingioh u Bah Everlasting Pyngrope iaka ‘National Teachers’ Award’ ka dei namar ka jingnoh synñiang kaba khraw jong u ha ka pule puthi khamtam eh ban kyrshan ia ki khynnah kiba donkam kyrpang.Ka skul Myngken Christian Higher Secondary School ka pyndonkam ïa ka ICT lyngba ki kor Computer lane ka Smart Class ban pynroi ïa ka jingpule kaba treikam bad ka jingïadei jong ki khynnah skul kaba kynthup ban pyniajan ka pule puthi bad ki khynnah ba donkam kyrpang. U Bah Everlasting u la pynleit jingmut ha ka jinghikai jong ki samla pule lyngba ka CWSN lane ki tiar hikai bad da kaba ïatreilang bad ka tnat District Social Welfare Department ban ïarap ïa ki samla pule kiba kwah ban pule. U Principal Myngken Christian Higher Secondary School u la trei shitom na ka bynta ka jingmyntoi jong ki khun samla ka thain, khamtam eh na ka bynta ki samla pule kiba wan naki longing ba duk bad ki bym lah shuh ban bteng iaka jingpule. Haba kren ha ka sngi pynkupburom iaki Nonghikai, ka President jong ka Ri India kala ong “Ki nonghikai ki hap ban pynkhreh ia kum kine ki nong shong shnong kiba ym tang ba ki long kiba la nang la stad hynrei ki long ruh kiba sngewrit, kiba hok bad kiba don jingthmu kaba bha”. Ka President ka la pynpaw ba ban iaid shakhmat ha ka jingim ka la dei lypa ka jingjop, hynrei ka jingmut jong ka jingim ka shong ha kaba trei na ka bynta ka jingbha jong kiwei pat.
“Ngi dei ban don ka jingsngewrit. Ka jinglong jong ngi ka dei ban long kaba don akor. Ka jingim kaba jop ka shong ha ka jingim kaba don jingmut kata ban hikai ia kine ki jinglong ha ki khynnah skul ka long ka kamram jong ki nonghikai” kala ong. Ka President ka la ong ba ki nonghikai ki don ka bynta kaba kongsan tam ha ka jingjop jong kano kano ka rukom hikai bad ka jinghikai kam dei tang ka kam hynrei ka long ka kam kyntang jong ka jingroi jingpar jong uwei pa uwei u briew bad lada u khynnah um lah ban leh bha, te ka rukom hikai bad ki nonghikai ki don ka jingkitkhlieh kaba kham khraw.“U khynnah u lah ban long u nongialehkai uba tbit bha, katto katne ki khynnah ki lah ban don ka jingtbit ban long nongialam, uwei pat u khynnah u iashim bynta da ka jingsngewtynnat ha ki kam pynroi ia ka imlang sahlang. U nonghikai u hap ban ithuh ia ka sap ba kynja met jong uwei pa uwei u khynnah bad ban pynmih ia ka sap” kala ong. Ka tnad pule puthi ka Sorkar Pdeng ka la jied ïa 50 ngut ki nonghikai na ka bynta ka ‘National Teachers’ Awards 2024’. La jied ia ki lyngba ka jingjied kaba shai bad lyngba ka Online lyngba 3 tylli ki bynta ba kynthup ha ka kyrdan jong ka District, ka Jylla bad ka ri.
Ki 50 ngut ki nonghikai kiba la shah jied ki dei na ki 28 tylli ki Jylla, 3 tylli ki UT bad 6 tylli ki Organisation bad napdeng ki 50 ngut ki nonghikai ba la jied, 34 ngut ki dei ki shynrang, 16 ngut ki dei ki kynthei, 2 ngut ki dei kiba duna dkhot met bapher bapher bad 1 ngut kiba trei bad ka CWSN. La pynkup burom ruh ïa 16 ngut ki nonghikai na ka Department of Higher Education bad 16 ngut ki nonghikai na ka Ministry of Skill Development and Entrepreneurship. Ka NEP 2020 ka ithuh ba ki nonghikai kiba don ka jingangnud, kiba don bor bad kiba lah ban leh ki long kiba kongsan na ka bynta ka jingkiew jong ki samla pule, ka jaka pule bad ka kam. Ha snem 2023, la rai ban buh 2r tylli ki khusnam na ka bynta ki HEIs bad ki Polytechnics hapoh ka NAT bad haduh mynta ki 16 ngut ki nonghikai kidei kiba la jied na ki Polytechnics, ki State University bad ki Central Higher Education Institutions.
