Ka shlem sain pyrthei jong ka Congress watla ha ki khyndiat bnai ka la mad ia ki jingtynjuh kiba har rukom, hynrei ki nongialam kim shem la duh mynsiem ban iai treishitom ban pynkhlaiñ ia la ka shlem, bad ha kane ka kynti ka la nang ioh mynsiem bad skhem triang hashwa ka ileksion MDC kaban sa wan hadien ka jingwan iasoh biang ki 3 ngut ki nongialam ba hakhmat ka party National People’s Party (NPP) lem bad ki spah ngut ki nongkyrshan.Ia kane la sakhi ha ka jingialang pdiang burom ka party Congress ia ki nongialam ka party NPP ha Nongpoh, ia kaba la pdiang ia u Bah Minsing Makri u ba dei u Adviser ka NPP Nongpoh Block, u Bah Stoin R Syngkli, Working President ka NPP Nongpoh Block bad Bah Lawrence Nongrum, Secretary barim ka NPP ha ryngkat palat spah ngut ki nongkyrshan ka party NPP. La pdiang burom ia ki nongialam ka NPP, da ki nongialam ba hakhmat ka party Congress ba kynthup ia u Bah MG Kharshanlor, President ka Ri Bhoi District Congress Committee, ka Kong Joplin Scott Shylla, President Meghalaya Pradesh Mahila Congress Committee, Bah Rocky Marwein, Vice President DCC, bah S W Mallai, President NBCC lem bad kiwei kiwei.
Haba pynpaw ia ka daw bah ba kitei ki nongialam ka party NPP ki la rai ban mih noh na kane ka party ki la pynpaw, ba kam don satia ka jingia burom lang para nongtrei da ki nongialam party ba hakhmat jong ka party khamtam ka jingleh shilliang khmat ia ki nongtrei kiba kham rit haba shakri ia ki kam party bad paidbah kaba pynduh mynsiem shisha ia ki haba ki thmu ban pyniar ia ka jingshakri paidbah. Ki la pynpaw ba ki burom ia u Dr. D.D Lapang uba ki la iatreilang bad uba la pyniasoh sha ka NPP kumta ki la pyniasoh sha katei ka party da kajuh ka thong hynrei dei haba ki la sdang ban treikam, ka jingthmu kam shym la long kumba ki mut bad ka la kylla khongpong pynban kumta da ka thong ban nang shakri paidbah ki la rai ban mih noh na ka party NPP ban iasoh sha ka party Congress. Na ka liang ki nongialam ka party Congress, naduh u Bah Kharshanlor, Bah Marweiñ bad kiwei kiwei ki la pynpaw ia ka jingkmen bad ioh mynsiem halor ka jingphai khmat da ki nongialam ka NPP ban wan iasoh sha ka Congress ban pynkhlaiñ biang ia ka party hashwa ka ileksion MDC kaban sa long shen ha ka jylla Meghalaya hi baroh kawei.
Ki la pynpaw ruh, ba watla ha ki khyndiat bnai ka la don ka jinghiran hapoh ka party Congress na ka jingmih noh jong ki 3 ngut ki MLA ka party hynrei ki nongialam kane ka party kim shem la duh mynsiem ne rai rem ban iai treishitom ban nang pynkhlaiñ ia ka party kaba don ia ka thong ban ai ka jingshakri paidbah kaba hok bad ka bym shah shilliang kumta ki la nang iaid shakhmat ban lum ban lang ia ki nongialam jong ki seng sain pyrthei bad ki nongkyrshan ban ieng skhem ha la nongrim. Shuh shuh ruh ki la pynpaw, ba kum ka party kaba la rim eh ha ka ri India, la nang sakhi ba ki paidbah nongshong shnong ka ri India bad ka jylla hi ki dang don ka jingieid jingshaniah ha ka party Congress kumta kum ki nongialam kin nang iai treishitom ban pynkhlaiñ ia ka party hashwa ka ileksion MDC bad ban pynurlong ruh ia ka thong da ka jingjop bun tylli ki Konstituensi ha katei ka ileksion ban wan.
