Shibynta ban pynsngewthuh paidbah halor ka jinglong kongsan jong ki Village Council lane ki Dorbar Shnong na ka bynta ban wanrah ia ka roi ka par jong ka shnong ka thaw, ka ophis u BDO ka Jirang Block, ka la pynlong ia ka Special Gram Sabha Meeting lane ka Special Village Council Meeting ha shnong Umtang, Jirang C&RD Block. Ia kane ka jingialang paidbah ban pynsngewthuh halor ki mat kiba long kongsan na bynta ban kyntiew ia ki Shnong ki thaw ka la long ruh katkum ka jingbthah jong ka Sorkar pdeng lyngba ka Ministry of Panchayat Raj ha ka jingiatrei lang bad ka Community & Rural Development jong ka Sorkar Meghalaya. Lah ban kdew, ba ki don 700 tylli ki shnong ha Ri India kiba la iohlad ban pynlong iaka jingialang ban sam ia ki jingtip halor kane ka program, katba 2 tylli ki Shnong ki la shah jied napoh ka jylla Meghalaya ba kynthup ia ka shnong Umtang na Ri Bhoi District. Ki nongiashim bynta ha kane ka programme, ki la ai ia ka jingpynshai shaphang ka rukom treikam katkum ka Village Level Development Plan lane ka VLDP kaba dei ka thong treikam lane ka jingdonkam jong ki paidbah nongshong ia ki jingdonkam ha ka Liang ka kam pynroi shnong.
Nalor ka VLDP ka la don ruh ka jingaiti jong ki SHGs lyngba ka Snohlang I Village Organisations jong ki SHG ia ka Village Poverty Resilience Plan kaba dei ka plan jong ki nongshong shnong ba la pynkhreh da ki SHG bad ka VO ia kaba la aiti sha u Rangbah Shnong ka Umtang ka ban sa pynshong nongrim katkum ka Village Level Development Plan. La wan ban ia shimbynta ha kane ka programme, da u MLA ka Jirang Konstituensi u Bah Sosthenes Sohtun, ha ka jingiadonlang u Dr. P Hajong, BDO ka Jirang C&RD Block, nalor kiwei kiwei ki ophisar, lem bad ki Sordar Shnong, ki Chairman bad Secretary VEC na ki Shnong ba marjan. Haba kren kum u kongsan, u Bah Sosthenes Sohtun, u la pynpaw ia ka jingkmen kaba khraw ban sakhi da lade ia kane ka prokram kaba long kongsan bha na ka bynta ban kyntiew ia ka shnong ka thaw ha ryngkat bad ka jingiatreilang bad ka Ophis u BDO ka Jirang Block, khamtam ka jingshah jied jong ka shnong Umtang napoh Jirang kum kawei na ki 700 tam ki Shnong ka ri India ban ioh pynlong ia kane ka prokram.
U la ai mynsiem bad ruh ka jingkitbok kitrwiang, ba kane ka shnong kan nang kiew na kawei ka por sha kawei pat, da ka jingiatreilang naduh ki nongpyniaid Shnong, ki nongshong shnong, ki nongialam jong ki SHGs, ki VO bad kiwei kiwei, da kaba bynrap, ba kum ka Shnong ka dei ban shim khia kyrpang ban pynurlong ia ka thong jong kane ka prokram. La pynkup burom ruh, ia ki 2 ngut ki nongshong shnong kiba la kham iaw ha ka ryta kiba kynthup ia u Bah Belief Rympei (75) bad ka Kong Melda Nongrum (54). La pynkut ia ka prokram da ka jingiathung dieng bad ka jingtian smai katkum ka Swasthya Pledge kaba dei ka jingkular ban leh khuid leh suba hapoh ka shnong ka thaw.
