Ka jinghikai shna khiew ranei ha shnong Tyrshang, West Jaiñtia Hills District ba shi bnai lynter ba la ai jinghikai da ka kong Helme Shylla, kum kawei kaba la ioh ia ka nam State Awardee jong u snem (2022-23) kala poi sha kaba kut daka jingialang sam syrnot bad ki tiar shna khiew ranei haka ïing ai jinghikai ne Pottery Training Center jong kane hi ka kong ha shnong Tyrshang. Kane ka jinghikai ba shibnai lynter dei kaba hap hapoh ka Handicraft Promotion Scheme jong u snem 2023-2024 bad la don kumba 20 ngut ki longkmie kane ka shnong kiba la ioh jingmyntoi.
Ia ki syrnot bad tiar shna khiew ranei la aiti shaki 20 ngut ki longkmie da u General Manager, District Commerce and Industries Centres, Jowai bah B. Warjri and ka kong S E Kharpran, Functional Manager, DCIC, Jowai. Ha kane ka sngi u bah B Warjri ula ai mynsiem bad kyntu kynpham ruh ia kiba la dep shah hikai ba kin ieid iaka sap bad ruh ula pashat halor ka jingdonkam ban pynneh pynsah ia kum kane ka sap tynrai.
Ia ka ïing ai jinghikai ne Pottery Training center jong ka kong Helme Shylla la iarap beit pisa daka Directorate of Commerce and Industries, Meghalaya Shillong kaba hap hapoh ka Handicraft Promotion Scheme 2023-24.
