Ka Ministry Finance ka Sorkar India ka la mynjur T.2,000 klur ban shna ïa ki surok bad ki jingtei ha ka Wat Baar jong ka Meghalaya Integrated Transport Project (MITP), ia kaba la tip ruh kum ka Meghalaya Economic Growth Accelerator (MEGA) Corridor Project. Kane ka jingbhah pisa thymmai ka dei ka jinglah ban pyntreikam ia ki projek ha ka wat nyngkong jong ka MITP. Katkum ka kyrwoh na u Commissioner bad Secretary, Planning, Investment Promotion & Sustainable Development jong ka Sorkar Jylla ula pyntip ba u Myntri Rangbah ka jylla u Conrad K Sangma, ha ka jingiakynduh bad ka Myntri Pla Tyngka ka sorkar pdeng ka Nirmala Sitharaman ha ka 24 tarik u Nailar 2024, ha kaba ula rah ia ki projek bad ula pan ia ka jingkyrshan pisa shuh. Ha ka Wat banyngkong jong ka MITP la pyntreikam da ka jingbei tyngka kaba T.880 klur na ka World Bank bad hapoh katei ka projek la tei ia ki katto katne ki surok kiba kongsan kum ka Baejendoba-Resubelpara-Mendipathar-Damra, Shillong–Diengpasoh bad Pasyih–Garampani bad ka jingpyntreikam kaba seisoh ia kine ki projek kala ioh iaka jingiaroh na ka World Bank bad na ka Tnad Pla Tyngka jong ka ri.
U Commissioner & Secretary ula iathuh, ba hapoh ka Wat Baar jong ka MITP (MEGA Corridor) Project yn tei palat 300 Km ki surok Double Lane kiba lah ban neh slem na ka jinglong ka suiñbneng kiban pyniasoh bad ka Shillong, Tura, Jowai bad Dawki bad yn pynleit jingmut kyrpang ia ki surok ha sor kiba pyniasoh ia ka New Shillong Administrative City bad ka New Shillong Knowledge City, da kaba pynkylla ia ka nongbah Shillong kum ka jaka kaba roi ha ka thaiñ. Nalor kane, yn pynroi ruh ia ki jingdonkam bapher bapher kum ki Industrial Park, Warehouses, Agro-Processing Center bad ki iew ki hat bad haba kyllum lang ïa kine ki jingdon jingem kin pynsted ïa ka ioh ka kot bad ka jingpynngam jylliew ha ki kam khaii pateng ha ki jaka kiba don sha jngai.
Ula iathuh, ba kine ki jingshimkhia lyngba ka projek MEGA Corridor, ryngkat bad ki projek kiba dang ïaid shakhmat, kum ka Shillong Dawki Road (NH 106 & 206), ka Tura Dalu Road (NH 217), ka Phulbari – Goeragre Road (NH 127B), ka jingkieng Dhubro-Phulbari kan plie ïa ki lad ki lynti ia ka Jylla ha kaba pynkylla kum ka jakapdeng bad ban don ia ka ioh ka kot kaba khlain bha ha ka thain, kaban iarap ha kaban pynurlong ba ka ioh ka kot ka jylla kaba kot sha ka 10 Billion USD hapoh u snem 2028.
