U Myntri Rangbah ka Jylla Conrad K Sangma hynne ka sngi, ula ia ki tiar tem tiar put sha ka kynhun ‘Eastern Brook Band’ ba dei ka kynhun tem jong ki samla ba don jingduna ka bor iohi.
U Myntri Rangbah ula pynurlong ia ka jingangnud jong katei ka kynhun ban pynioh ia ki tiar tem lyngba ka Meghalaya Grassroots Music Programme, kaba dei ka prokram kyrpang jong ka Chief Minister Office (CMO) ban kyntiew bad kyrshan ia ki kynhun bad ki samla don sap ka jylla ha ka put ka tem.
Ka Eastern Brook ka kynthup ia 4 ngut ki dkhot bad ka dei kaba paw ha ka tem ka put da kaba rwai ia ki jingrwai ba sngewtynnad hynrei kane ka kynhun watla kam ka don ka jingduna ha ka bor iohi pynban ka la jam shakhmat ha ka put ka tem.
Halor ka jingkyrpad ka kynhun, u Myntri Rangbah ula shimkhia ban pynurlong ia ka jingangnud katei ka kynhun khnang ba kin lah ban kyntiew ia ka sap ka phong ba ki don.
U Conrad Sangma ula iaroh ia kane ka kynhun bad ula pynshlurba kin iai bteng ban pynjanai ia ka sap ban kynjoh ia ka thong shajrong kum ka kynhun tem.
