Ka JJM Nicholas Roy Memorial Committee bad ka JJM Nicholas-Roy College ryngkat ka jingiatreilang bad ka Khasi Hill Autonomous District Council (KHADC) hynne ka sngi, ki la pynlong ia ka jingkynmaw burom ia ka lyngkhuh sngi ïap ba 65 jong u Rev JJM Nicholas -Roy, u Kpa ka Sixth Schedule jong ka riti synshar ka ri. Ha kane ka sngi, kum ka dak jong ka jingkynmaw burom ia une u riewkhraw ka ri, la pynlong iaka jingbuh syntiew ha u mot sahnam uba don ha ka KHADC ia kaba la iashim bynta da u CEM ka KHADC u Bah Pyniaid Sing Syiem, u Deputy CEM u Bah Pynshngain N Syiem, u Chairman ka JJM Nicholas-Roy Memorial Committee u Bah Ransom Sutnga bad kiwei kiwei. U Bah Pyniaid Sing Syiem ula pyrto ia u Rev JJM Nichols Roy uba la shimkhia ha ban pynwandur ia ka Sixth Schedule jong ka riti synshar ka ri bad dei ha u snem 1952 ba la ioh ia ki Autonomous District Council (ADC) ha ka Ri India bad haduh mynta ki la don 10 tylli ki ADC ha ka thain shatei Lammihngi jong ka ri India.
Ula ong, mynshwa kiwei ki ADC kim ju tip shaphang u JJM Nicholas -Roy hynrei lyngba ki sienjam kiba la shim da ka KHADC, mynta wat kiwei ki ADC ruh ki la ithuh ia u JJM Nicholas-Roy kum uwei na ki riew khraw ka Sixth Schedule kynthup ia ka Tripura Territorial Council ka don jingthmu ban tei noh ia u mot sahnam jong u Rev JJM Nichos Roy ha Agartala. U CEM u la ong, ba bun ki la kynthoh pyrshah ia ka Sixth Schedule hynrei kum ki MDC ki sngewthuh ia ka bor jong ka Sixth Schedule kaba u Rev JJM Nicholas -Roy ula ai sha ka jaidbynriew.
Ula ong, bun ki la ia mih ban ïalam bakla, ban ong ba ym donkam shuh ia ka Sixth Schedule hynrei tang ban iakhun ban wanrah ka jingpynkylla ruh ka shim por haduh 73 snem kat ban ioh da ka aiñ ba thymmai ha Parliament mano ban sngap ia ka jaidbynriew. Na ka liang u Bah PN Syiem ula ong ba ka Sixth Schedule ka dei ka iktiar kaba khlain bha ban iada ia ki rit paid bad kane ka dei ka jingpynwan dur jong u Rev JJM Nicholas -Roy.
