Ka University of Science and Technology Meghalaya (USTM) ha 9 Mer, Ri Bhoi District mynta ka 26 Tarik Risaw ka la pynlong ia ka jinglehkmen lang halor ka jingmynjur ka National Medical Commission (NMC) ban sdang noh ia ka P.A Sangma International Medical College and Hospital (PIMC). La sakhi ba ha kane ka sngi lehkmen jong ka USTM, la wan ban ia don bynta lang ruh da ka Soradini K Sangma ka kurim u Purno A Sangma, Bam Kwai ha Dwar U Blei, u Myntri Rangbah ka jylla Meghalaya u Conrad K Sangma, ka Dr. Ampareen Lyngdoh, Myntri ka tnad ka Koit ka Khiah ka jylla Meghalaya, u Bah AT Mondal, Myntri ka Tnad sam Bording, u Bah Balajied Kupar Synrem, MLA ka Shella Konstituensi, u Mahbuhul Hoque, Chancellor ka USTM nalor kiwei kiwei ki riew pawkhmat, ki doctor, ki nurse jong ka PIMC, ki kmie ki kpa bad ki khynnah pule kane ka skulbah. Haba kren ha kane ka prokram leh kmen jong ka skul bah USTM, u Conrad K Sangma, nyngkong eh u la ai ka jingiaroh kaba khraw halor ka jingtreishitom ki bor ka USTM khamtam u Chancellor ban pynurlong ia ka thong ban wanrah ia ka jaka pule kaba kyrpang ki doctor hapoh kane ka jylla, da kaba ai burom ruh ia ki bor ka Ministry jong ka tnad ka Koit ka Khiah ka sorkar pdeng khamtam ia u Myntri JP Nadda bad kiwei kiwei ban ai jingmynjur na bynta kane ka hospital kaba 150 seats.
U la ong ruh, ba ka long ka jingkmen kaba khraw ia u, namar ba u la don bynta lang ha ka ban pass ia ka bill jong ka skulbah USTM ha u snem 2008 bad mynta ka jingjop jong kane ka skulbah ban ioh sa ka shnat pule doctor ka dei ka jingjop jong ka jingtreishitom bad ka jinglong nongialam kaba kynsai. U la pharia ruh, halor ka rukom im jong u nongialam barim ka sorkar jylla u Purno A Sangma halor ka jingsngewrit ka jong u bad ka thong ba u phaikhmat ban kyntiew ia ki samla pule namar ka jingkyntiew ia ki samla kan sa ai pat ia ka nong kaba khraw ia ka ri bad ka jylla hi baroh kawei.”Ka sorkar jylla ka la phaikhmat bha ban kyntiew ia ki tnad ka Koit ka Khiah ka jylla khamtam ha ka jingpynmang pisa kaba kham heh ban pynbit pynbiang ia ki jingdonkam kum ki jingtei ba paka, ka jingpyndap ia ki doctor, ki nurse bad kiwei kiwei kumjuh ban pyntikna ia ka rukom pynbiang ia ka jingsam ia ki dawai sha ki District bapher bapher”, ong u Conrad K Sangma. Kum u Myntri Rangbah ka jylla, u la ai ruh ka jingkitbok kitrwiang ia ki bor ka USTM ba kin nang kiew ha ka thong ban pyniar ia u jylli ka jingnang jingstad ha ki laiñ pule bapher bapher da kaba angnud ruh ba kane ka skulbah kan lah ban nang pynjanai ia ki lad ai jingnang jingstad bad ban nang kiew artad na kawei ka por sha kawei pat.
U Chancellor ka USTM, u M Hoque haba ai jingkren ha kane ka sngi u la ai khublei kyrpang ia ka sorkar jylla Meghalaya kaba la ai ka jingkyrshan kaba radbah ban kyntiew bad ban pynurlong ia ka thong jong kane ka skulbah ha kiba bun ki bynta jong ka jingpule puthi khamtam ha kaba ia dei pat bad ka jingioh pat sa ia kane ka jaka pule doctor kaba 150 seat. U la pynbna ruh, lyngba kane ka jingialang ba shen ka USTM kan sa sa seng ruh sa ia ka Dental Hospital ia ka ban ai nam ia u Dr. Donkupar Roy (Bam Kwai ha Dwar U Blei) u ba dei ruh u Myntri Rangbah barim ka jylla Meghalaya.
