Ka Samsung India mynta ka sngi ka pynbna ia ki 10 tylli ki kynhun kiba wan sha khmat eh ha ka jingiakob ‘Solve for Tomorrow’ 2024, kaba long kawei na ki prokram ban noh synniang sha ka imlang sahlang ne ka CSR programme. Kine ki 10 tylli ki kynhun mynta ki la ioh ban rung sha ka lympung jong ka jingiakob kaba khatduh ne ka grand finale ha kaba kin pyni paidbah ia ki buit treikam ba kyrpang jong ki sha ki nongbishar ba kynthup ia ki nongialam ka Samsung bad kiwei kiwei ki riew pawkhmat na ki karkhana bapher bapher, Kine ki kynhun kiba la shah jied kidei kiba na ki bynta ba kham sha kyndong jong ka ri, kynthup ba ki jaka ba kham sha kyndong jong ka Golaghat bad Kamrup ha Assam, Jhalawar ha Rajasthan, Udupi ha Karnataka, bad Bilaspur ha Chhattisgarh, kaba pyni ia ka jinglah ban phrung khlieh jong kane ka prokram ha kitei ki thain.
Kine ki kynhun kiba la ioh rung sha ka phainal ki la dep ban iaid lyngba bun tylli ki wat jong ka jingiakhun ha kaba ki la hap ban pyni ia ki buit treikam jong ki sha ki nongbishar kiba dei ki dkhot jong ka Samsung bad sha ioh ruh ia ka jingshah hikai na ki riew shemphang kiba dei na ka Samsung and Foundation for Innovation & Technology Transfer (FITT), IIT Delhi. Kum ka khusnam, baroh kine ki 20 tylli kynhun ki ioh ia ka pisa 20,000 tyngka ba kin shna ia kita ki tiar kiba ki la batai, Nalor kane, kito kiba la shah jied na ka youth track ki ioh ruh ia ka Samsung Galaxy laptop kaba thymmai katba ki kynhun na ka thup jong ka school track ki ioh ia ka Galaxy tab.
Ha ka bynta kaba lai ne ka 3rd edition jong ka prokram, ki khynnah bad samla pule ki phah ia ki buit treikam kiba ki don halor ar tylli ki phang: Kawei ka ‘Community and Inclusion’ bad kawei pat ka ‘Environment and Sustainability.’ Hapoh jong kine ki ar tylli ki phang kiba iar, bun na ki buit treikam ki long kumno ban wanrah ia ki lad ki lynti ban ialeh ia ki jingeh kiba don ha khmat kum ha ka pule puthi bad kumno ban ioh ia ki lad jingiarap na ka bynta ki khynnah kiba wan khamtam na ki shnong ki thaw kiba duna ha kane ka liang, ki jingeh kiba iadei bad kumno ban pule lyngba ka jingioh ban pyrshang ia kiei kiei, ka jingnang jingtip ha ka liang ka digital, ka jingpynneh pynsah ia ka um, bad ka jingjaboh kiba long bih,
Kine ki kynhun ki la iashim bynta ruh ha ka ‘Innovation Walk’, ia kaba la saindur ban ai ia ka ka jinghikai, ka jingioh ia ki jinghikai na ki riew shemphang bad ka jingailad ia ki khynnah bad samla pule ba kin oih ia ki jingtip shaphang bun kiei kiei, Ia kane la pynlong ha ki ophis treikam bapher bapher jong ka Samsung ba kynthup ruh ia ka Samsung R&D Centres ha Bengaluru, bad Noida, bad kumjuh ruh ha regional headquarter ha Gurugram. Ki khynnah bad ki samla pule ki la iashim bynta ha ki lympung kiba iadei ba ka jingbatai bniah shaphang ki tiar ki tar ba la pynmih bad kumno la shna ia ki, kaba la iarpa ruh ia ki ban nang kham pynbha shuh shuh ia ki buit treikam jong ki. Hadien kane la bud pat sa da ka National Pitch Event, ha kaba la jied ia ki 10 tylli ki kynhun.
