Ki khynnah skul jong ka Raid Shabonng Border Area govt Sec School ki la ioh rah ia ka nam jop ha ka jingiakob ha ka cluster round jong ka lympung iakob National STEM Challenge, kaba la pynlong da ka Brillio ryngkat ka jingiatreilang bad ka STEM Learning, kaba long ka shlem treikam kaba iarap ban wanrah ki lad ki lynti ban weng ia ki jingeh ba mad da ka imlang sahlang kaba la trei tyngeh ban kyntiew ia ka jingai jinghikai jong ka STEM hapdeng ki khynnah skul.Ia ka wat jingiakhun jong ka cluster round, la pynlong ha Lumparing Vidyapeeth, Shillong, ha kane ka sngi la pynlong ruh ia ka jingpynkup burom ia kine ki khynnah skul da ka kynhun jong ka STEM Learning bad ki nonghikai. Kine ki nongjop mynta kin lah ban jam shuh sa sha kawei pat ka wat jong ka jingiabokob bad kata ka long ka Zonal round, da kaba buh ia ka thong ha khmat bad kata ka long ban iakob na ka bynta ka wat jong ka Phainal ha Bengaluru.La pynlong ia kane ka lympung kum ka jingsdang jong ka jingrakhe ba shisnem lynter ia ki bynta bapher bapher STEM (science, technology, engineering, mathematics), ba kynthup ia ka jingiakob shna ia ki dur ne ki model ha ka subjek science bad mathematics model, kumjuh ruh ban shna ne pynkylla ia ki jingshna kiba iadei bad ka technology bad engineering.
Ka jingiakob jong ka Brillio National STEM Challenge kadei ka jingiakob jong ka ri baroh kawei, da kaba wanrah ia ka rynsan kaba biang bad paka bha ban ioh jingtip shaphang ka STEM na ka bynta ki khynnah skul jong ki skul sorkar bad ki skul kiba la ioh jingiarap na ka sorkar ha kylleng ka bynta jong ka India. Kane ka sienjam treikam kadei shi bynta jong ka jingtrei ba radbah jong ka Brillio ban kyntiew shuh shuh ia ki sap ki phong jong ki khynnah. La saindur ia kane ka lympung ba kan ktik ia ka jingmut jingpyrkhat, ban pynlong ia ki khynnah ba kin sei ia ki buit thymmai, bad ban pynlong ia ki khynnah naduh klass 6 haduh 10 ba kin pyndonkam ia ka jingmut jingpyrkhat jong ki, kane ka lympung kadei ka lympung kaba kynthup lang ia baroh ki khynnah khlem da thew kidei kiba wan na ka imlang sahlang ne ka longing longsem kaba kumno. U Ashutosh Pandit, u nongseng jong ka STEM Learning, u ong, “Nga sngew kmen ha kaba iadei bad ka jingpynlong iaka ka lympung jong ka National STEM Challenge ha ka sien kaba saw bad ha kajuh ka porn ga sngewkmen ban iohi ia ka jingiashim bynta jong kine ki khynnah kiba dang rit kiba la jam sha ka wat jong ka Zonal round. Ka STEM Learning kadei ka shlem ai jinghikai ba la aiti na ka bynta ban nang kyntiew ia ki jinghikai ha ki jaka kiba kham sha kyndong da kaba wanrah ia ki rynsan kiban lah ban sei ia ki sap barieh jong ki khynnah kiba don ha ki skul kibym pat da paw. Ngi thmu ba ngin lah ban pynsaphriang ia kane ka jinghikai sha baroh ki kyndong kynshrot jong ka ri bad ktik ia ka jingmut jingpyrkhat jong ki khynnah ha kaba iadei bad ka science bad ba kin long kiba kwah ban wad jingtip, bad kane kadei ka nongrim jong ka jingsdang ia ka National STEM Challenge. Khnang ban pyniar ia ka jingshakri, ngi khmih lynti ban ioh ia ka jingiatreilang bad ki corporate ne ki jaka treikam bad iatehlok bad ki ha ka jingpyntreikam ia ka CSR ban wanrah ia ka jingkylla kabab ha bad ba iaineh ha ka rukom ai jinghikai ha ki skul kiba don ha ki shnong kiba kham sha kyndong..”
Ka STEM Learning ka long kum kawei na ki shlem ai jinghikai kaba nyngkong kaban aiti na ka bynta ban kyntiew ia ka jinghikai ia ka STEM ha kylleng ki bynta jong ka ri India. Da ka jingdon jong ka jingtreikam jong ka ha ki 3,800 ki skul ha kylleng ka ri, ka STEM Learning ka la iatehlok bad palat 250 tylli ki corporate ban buh ia ki science center, science lab, had ki tinker lab ha ki skul sorkar kum shi bynta jong ka jingpyn treikam jong ki ia ka CSR. Da ka jinglah ban kner ia ka jingtreikam sha palat shi million ngut ki khynnah pule, ka STEM Learning ka la lah ban wanrah ka jingkylla ha ka rukom ai jinghikai da kaba kyntiew bad pynkup bor ia ki nonglap ia ki buit bad ki jingstad thymmai ha ka pateng ban wan. I Drishti Thapa I khynnah skul jong ka Lumparing Vidyapith Secondary School Shillong I ong: “Ka jingiaid lynti ha ka jingiashim bynta ha ka jingiakob ia ka National STEM Challenge ka la long kaba sngewtynnad na ka bynta jong I bad ki paralok jong i. Ka la pyni ia ki ba kam don kawei ruh ka jingangnud ne ka jingphohsniew kaba heh ne ka bym lah ha kaba iadei bad ka jingwanrah ia ki lad ki lynti kiban iarap ban weng ia ki jingeh ba ka pyrthei ka iakynduh. Kane ka jingiakob ym tang ba ka pyniar ia ka jingmut jingpyrkhat hynrei ka la pynkhih ia ka mynsiem ban don ka jingangnud ban wad ia ki lad bad ki buit thymmai bad kumjuh ruh ha ka pule puthi. Ryngkat ka sap bad kumjuh ruh ka jingtip bad la ioh, ngi sngew ngi la long kiba la pynkhreh ban leh eiei bad noh synniang na ka bynta ka pyrthei- da ka jingstad science bad technology.”
