Julor ka surok na Mawsiatkhnam shaduh Madan Mawkhar ba ïaid trok

Ka Synjuk ki San Shnong ki shnong ba kynthup ka shnong Mawsiatkhnam, Umrynjah, Nongkohlew, Umphrew, bad ka shnong Madan Mawkhar hynne ka sngi kila ujor sha ka Deputy Commissioner (DC) ka East Khasi Hills namar ka jingiaid ki trok kit palat pud na ka surok ba don ha kine ki shnong. Haba kren sha ki lad pathai khubor, u president ka Synjuk ki San Shnong u Bah B Thangkhiew ula iathuh ba naduh ka por ba la khang iaki Trok ban iaid na jingkieng Umiam, ki Trok khamtam kiba kit palat pud kila iaid na kane ka surok kaba iaid lyngba ki shnong Mawsiatkhnam, Umrynjah, Nongkohlew, Umphrew, bad shnong Madan Mawkhar. U Bah Thangkhiew ula ong ba kine ki Trok ki iaid na kane ka surok Umrynjah ka ban leit sha Airport Umroi haka por da miet bad kane kala pynlong ban sniew ka surok ka ban wanrah jingeh kaba khraw ia ki nongshnong shnong.

Ula ong ba kawei ka jingkieng Umrynjah kaba don marjan Umroi Airpot ka long kaba rit bha bad lada ki trok ba kit palat pud ki iaid na kane ka jingkieng, kan poi kawei ka sngi ba kane ka jingkieng ruh ka sniew noh.“Ka jingiaid ki trok kit palat pud na kane ka surok kaba iaid lyngba ki shnong Mawsiatkhnam, Umrynjah, Nongkohlew, Umphrew, bad shnong Madan Mawkhar kala pynsniew haki katto katne ki bynta jong ka surok hynrei kaba kham ma, ka mih ioh ka sniew sa ka jingkieng Umrynjah namar kadei ka jingkieng kaba la shna la slem bha” la ong u Bah Thangkiew.

U Bah Thangkhiew ula ong ba kum ki nongialam shnong, ki sngewkhia halor kane bad dei namar kane kila wan ban ujor shaka DC ban tuklar mardor. Haba kylli u bah Thangkhiew ula ong “Naka liang ka DC kala shim khia ia kane ka kam, bad kala shim ka jingkitkhlieh ban pynbeit ia kane ka kam khamkloi khnang ba kan nym wanrah ka jingeh iaki paidbah kiba don ha kine ki 5 tylli ki shnong”.