Dawa ka FKJGP ban pyntreikam da ka ‘Road Delivery Challan’ ha Meghalaya
Shillong, Naitung:Da ka jingsngewkhia kaba jur halor ki jingeh kiba bun ba kum ki nongrep ki ju mad khamtam na ki jinghap ban siew ia ki khajna babun ba khlem jingmut, na ka liang ka Federation of Khasi Jaintia and Garo Federation (FKJGP) mynta ka 22 Tarik u Naitung ka la dawa ban pyntreikam noh da ka Road Delivery Challan hapoh ka jylla Meghalaya ban pyllait ia ki nongrep na ka jingsiew khlem nongrim ia ki khajna ba ju dawa da ki riew shim kabu ha ki surok bah National Highway ka jylla Meghalaya.
Ia kane ka jingdawa na ka liang ka FKJGP ka la pynmih hadien ba kum ka kynhun ka la leit ban synran lang ia ka kynhun jong ki nongrep ban kynduh ia ka Myntri ka Tnad ka Rep ka Riang ka Dr. Ampareen Lyngdoh ban iakren halor ki jingeh ba la mad da ki nongrep ha ki bynta ban kit ban bah ia ki mar rep sha ki iew ki hat ban die ia ka ki mar rep kiba shu shalan sha kylleng ka thain Lam Shatei Mihngi (North East).
U Bah Dundee Khongsit, President ka FKJGP haba kren bad ki Nongthoh Khubor, u la iathuh, ba hadien ka jingtip na ka por sha ka por ba ka seng ka la ioh halor ki jingeh jong ki nongrep ka jylla Meghalaya kaba ia dei bad ka jingkit jingbah ban pynpoi ia ki mar rep sha ki iew ki hat, na ka liang ka seng ka la buh ia ka jingdawa ba ka sorkar jylla ka dei ban shimkhia noh mardor ban pynduh noh ia ka jingkhrong khajna beaiñ ha ki surok bah ha kylleng ki National Highway jong ka jylla Meghalaya kiba shah pan khajna naduh T.500 haduh T.1500 da ki kynhun riew shim kabu bapher bapher.
U la iathuh ruh katkum ka jingtip jong ka Seng, la ioh jingtip ba ki paid nongrep ka jylla bad kiwei kiwei kiba ju shalan ia ki mar rep sha ki iew ki hat ka thaiñ Thaiñ Shatei Lam Mihngi ki ju shah dawa Pisa ha ki surok bah bad lada ki kyntait ban siew, ki riew shim kabu ki ju pynthut bad pynsangeh ia ka leit ka wan ne ka kit ka bah ban pynpoi sha kito ki jaka ba ki thmu ban leit rah ia ki mar rep jong ki.
U Bah Khongsit, u la iathuh ba hadien ka jingiakynduh ia ka Myntri ka Tnad Agriculture ka Dr. Ampareen Lyngdoh na ka liang ka seng ka la buh ka jingdawa na ka sorkar jylla ba ka dei ban pyntreikam noh da ka Road Delivery Challan khnang ba ki nongrep kiba kit ia ki mar rep kin lait na ka jingshah pyndik ha ki lynti syngkien ha ki riew shim kabu kiba ju khrong Pisa na ki kali kit mar rep bapher bapher.
Nalor kane, u Bah Dundee ula iathuh ha ka jingialang ka FKJGP lem bad ki Nongrep, ki la kyntu ia ka Myntri ka tnat ka rep, ka riang ban maramot ia ki surok ha ki thain Lumshnong East Jaintia Hills khnang ban suk ka khaii mar rep sha ki kata ka thain bad sha ka Jylla Assam.
