Ki nongialam ka Hynñiewtrep Youth Council (HYC) lem bad ki nongialam ka Meghalaya People’s Social Organisation (MPSO) Ri Bhoi District ha ka 7 tarik Risaw, ki la hiar sha ka shnong Nongspung B ban iakynduh ia ki lanot kiba la mad ia ka jingshah pynjulor ki jingdon jingem jong ki tang na ka daw ka jingtuid jong ka khyndew ktieh bad ki maw ki shyiap na ka jingtih lum beaiñ jong u wei u bar jylla. Tang hadien ka jingmih ha ki Lad Pathai Khubor, halor ka jingjia shah pynjulor ki jingdon jingem, kynthup ia ki iing ki sem jong ki san tylli ki longiing bad ruh ki jingthung jingtep namar ka jingtuid kaba shyrkhei jong ka ktieh ha ka shnong Nongspung B ha Ri Bhoi District, ki nongialam jong kine ki ar seng ki la shimkhia ban wad ia u trai ba la pyntrei ia ka jingtih lum ha katei ka shnong bad ban dawa ruh ia ka bailutksan na bynta ki jingduhnong jong kitei ki longiing.
Lah ban kdew, ba u wei u bar jylla na ka Jaidbynriew Naga u Donald Srinate, u la tih ia u lum ba don markhap bad ka shnong Nongspung B ha kaba la kynnoh ba u la shu tih beaiñ khlem ka jingtip jong ki bor pyniaid shnong bad la kynnoh ruh ba u la shimkabu ia ka jingai jingbit naduh u Rangbah Shnong barim jong kane ka shnong, hynrei u la iai tih ia u tei u lum haduh ba la mih ki jingjia shah pynjulor jong ki longiing longsem khamtam ki longiing baduk kiba la shah ktah na ka jingtuid ka ktieh, ki shyiap ki maw ymtang katta ka la don ruh ka jingshah pynjulor jong ki jingthung jingtep ha kane ka shnong.
U samla Tony Shylla bad u Samla RC Thangkhiew, kum ki nongialam ka HYC Ri Bhoi District, ki la leit ban ia kynduh bad ban jurip hi ia kine ki longiing kiba la mad ia kane ka jingjia shah pynjulor ha kaba la sakhi ia ki jingsangsot jong kine ki longiing. Na ka liang kine ki nongialam, ki la leit ruh ban ia kynduh ia u Donald Srinate u ba la tih ia u lum ban dawa jingpynshai na u bad ruh ban dawa ia ka bailutksan halor ki jingjulor jong ki longiing longsem bad ruh ia ki jingthung jingtep, ha kaba u tei u bar jylla u la kohnguh ban siew ia ka bailutksan baroh.
