U MP ka Tura u Saleng A Sangma ula leit jurip ia ka North Eastern Indira Gandhi Regional Institute of Health and Medical Sciences (NEIGRIHMS) hadien ba ula shah thung kum u dkhot jong ka Governing Council dang shen.U Saleng ula lum ia ka jingialang ha kaba ula ioh ia ka jingbatai shaphang ka jinglong jingman jong ka NEIGRIHMS bad ula iakren bad ki doctor bad ki nongtrei na ki tnad bapher bapher jongka. NEIGRIHMS bad ula iakynduh ruh ia ki nongialam jongki nongtrei ka NEIGRIHMS bad ia ki Nursing Association. Haba ai jingkren, u Saleng ula ong, ba ka jingthmu jongka jingjurip ka jongu, ka long ban ioh ia ka jingtip bad ban sngewthuh bha ia ki mat bapher bapher kiba ktah ia ka NEIGRIHMS bad dei tang hadien kane ka jingjurip ba yn lah ban rah ia kitei ki mat sha ka Sorkar Pdeng ba kan pynthikna ba kan pynkylla ia ka NEIGRIHMS kum ka jaka ai jingsumar kaba paka kaba don ha ka kyrdan kaba halor eh ban ai jingshakri ia ki paidbah bad ia ka thain shatei lam mihngi.
U MP ula kyntu ia ki nongpyniaid bad ia ki doctor ba kin ai da ka jingthoh kaba bniah halor ki jingdonkam khnang ba un lah ban shimkhia ban lah ban pynbeit noh mardor bad ula ong, ba ka thain baroh kawei ka phaikhmat sha ka NEIGRIHMS namar ba kadei ka Hospital kaba bha tam bad ka jaka ai jinghikai ha ka thain. Ula ong ba un sa lum ia ka jingialang bad baroh ki MP ka thain shatei lam mihngi khlem da khein ia ka seng sain pyrthei kaba ki don hynrei kin buh hakhmat naka bynta ban iarap ban pynbeit ia ki jingeh kiba kongsan, namar ba ka NEIGRIHMS kadei ka jaka ai jingsumar kaba kongsan bha ha ka thain̈.
U MP ula pynthikna ruh ba yn rah ruh ia ka jingkyrpad ka NEIGRIHMS’s na ka bynta ban ioh ia ka jaka ban tei ia ka Guest House na ka bynta ki nongpang hajan ka NEIGRIHMS bad ka sorkar Meghalaya, namar ba kane kan long ka jingiarap kaba khraw ia ki nongpang kiba wan na ki jaka kiba jngai ban ioh jingsumar ha NEIGRIHMS. Na ka liang u Director ka NEIGRIHMS u Prof Nalin Mehta ula pynpaw ha u MP halor ki mat kiba kongsan jongka ka NEIGRIHMS kaba kynthup ia ka jingduna ha ka jingdon ki doctor, ka jingsahteng kaba la slem ha kaban khmih bniah ia ki Cadre, ban ia ryngkat bad ka AIIMS New Delhi bad PGIMER, Chandigarh bad ka jingdonkam ia ka jaka ban shna ia ka Guest House na ka bynta ka jingdonkam ki nongpang.
