Ka Administrative City ba T.2,500 klur yn tei ha New Shillong

Kum shibynta ban pynkylluid ia ka nongbah Shillong, ka Sorkar Jylla ka la mang T.2,500 klur na ka bynta ban tei ia ka Administrative City ha New Shillong Township. Haba pyntip ia kane u Myntri Rangbah u Conrad K Sangma ula ong ba kane ka Administrative City bala thmu ban tei, kan sa sdang paw kam noh shen ha ka thain Mawdiangdiang.

“Kan dei ka project ka ban shongdor palat ia ka T.2,500 klur lada hi dei ban kynthup ia baroh naduh ka jingpyniasoh surok, jingpynpoi umbam umdih bad ka jngpynieng ia ki jingtei bapher bapher” la ong u Conrad. U Conrad ula iathuh ba dang shen ula shim ia ki jingthoh ba iadei bad ka design (jingpynwandur) ia ka Administrative City bad shen un sa rah ia kane hapoh ka jingialang jong ka Kynhun Myntri naka bynta ban iatai sani bad ban iamir jingmut.

Ula ong ba lada ka Kynhun Myntri kala ai jingmynjur ia ka design, ka Sorkar kan khot Tender ia ki kam hadien bala dep pyn khreh ia ki DPR ka ban long haba kut jong ka quarter ba 2 u snem 2024-2025.“Ka jingthmu hi ka long ban wanrah ia ka synshar khadar bad ka jingshakri sha ki paidbah hapoh kawei ka tnum lane kawei ka phyllaw khnang ba ki paidbah ki lah ban leit tang shi jaka bad ioh lut ia baroh ki jingshakri bad baroh ki jingiarap ba ki donkam” ula ong.