Ka Garo National Council ka la phah ia ka jingai jingmut sha ka Expert Committee on Reservation Policy, ha kaba ka la pynpaw ba ia ka jingbhah ia ka Reservation Policy dei ban pynshong nongrim katkum ka jingsahdien ym katkum ka jingbun paid.Ka GNC ka ba dei ka seng saiñ pyrthei kaba la rim tam jong ka rilum Garo, ka la pynpaw ba ka riti synshar ka ri ka la kdew shai ba ka kyndon jong ka jingbhah na ka bynta ki Backward Classes, SC bad ST, dei ban pynshong nongrim katkum ka jingsahdien jong ka imlang sahlang, ka ioh ka kot, bad ka pule puthi bad ym ha ka jingbun paid. U General Secretary ka GNC u Augustine R Marak ba ia ka jingkhmih bniah ne kano kano ka jingpynkylla ia ka Reservation Policy ka Meghalaya ha kaba iadei bad ka jingbun paid ne ka jingheh ka jaka kam dei satia kaba lah ban pdiang katkum ka jingdawa ka Voice of People Party hynrei dei ban pynneh kumba ka long ne Status Quo ia ka policy bad kala kdew ia ka jingleh shilliang ha kaba iadei bad ka rukom thungkam ha ki kam sorkar ia ki jaidbynriew Garo.
Ula pynpaw ruh ba ha ka jingthep kam lyngba ka MPSC ki jaidbynriew Khasi-Jaintia kila ioh bha ia ka lad ban iohkam iohjam watla kila kiew bha ha ka liang ka ioh ka kot ne ka pule puthi bad kala kdew ruh ba kala don ka jingduna bha ha kaban thungkam ia ki Garo ha ki District Selection Level ia ki Garo kiba don ha ka rilum Khasi.U Augustine R Marak ula pynpaw ba “Kila don shi lak ngut ki Garo kiba la kha bad la heh la san ha kylleng ki bynta jongka Khasi-Jaintia Hills bad kidei kiba nang bha ban kren ia ka ktien ka thylliej hynrei kim shym la shah jied ban shah thungkam ha ka district jong ka rilum Khasi naduh ba la thaw ia ka jylla. Kumta ki Garo kiba sah ha Khasi Hills kila shah lehbeiñ ha kaba iadei bad ka jingshah thungkam”.Ula ong, ba u kloi ruh ban sei ia ki kot ki sla ban kyrshan ia ka jingkynnoh ka jongu halor ka jingshah leh shilliang khmat ki jaidbynriew Garo ha ka jylla. Shuh shuh ka GNC, ka la pynpaw ruh baroh ki Secretariat bad Directorate Office ki don ha Khasi Hills District, ha kaba ha Khasi-Jaintia Hills ki don 7 District, katba ka Garo Hills ka don 5 District.
Ka Khasi Jaintia Hills ki don 5 tylli ki Civil Sub-Division hynrei ka Garo Hills ka don 3 tylli ki Civil Sub-Division, ka Khasi Jaintia Hills ka don 26 tylli ki C&RD Block hynrei ka Garo Hills ka don 20 C&RD Block.Ka GNC kala ai nuksa ba mynta u snem ha ka Class X (SSLC) bad Class XII (HSSLC) Result, kala kdew ba ha ka Class X result ka West Jaintia Hills kala wan nyngkong ha ka jingpass ki khynnah pule, ha kaba kala ioh 78.34%, ka East Khasi Hills 77.09% bad East Jaintia Hills 70.88%. Ha ka class XII result, ka East West Khasi Hills ka jingpass ka long 92.32%, ha East Khasi Hills 89. 96%, ha West Khasi Hills 87. 66%. Katba ka thaiñ Garo Hills kam shym la lah satia ban poi ha ka Top 5 hapdneg jong ki Districts ha ka jingpass ki khynnah ha man la u snem jong ka jingmih result.Ki jaidbynriew Garo ki dang sahdien bha ha kaba iadei bad baroh ki surok, ka koit ka khiah, ka imlang sahlang, ka ioh ka kot bad ha ka pule puthi bad da lei lei ruh kin ym lah ban iakhun bad ki ar tylli ki jaidbynriew riewlum ka jylla kiba la nang jam shaphrang kiba kynthup ia ki Khasi bad Jaintia. Ka GNC ka la pynkut da kaba pynpaw ba ka pyrshah jur ia ka jingthmu ban khmih bniah ne pynbeit thymmai ia ka Reservation Policy ka jylla bad kala kyrpad ia u Chairman ban pynneh kumba ka long ia ka Reservation Policy na ka bynta ka bha ka miat jong ki jaidbynriew Garo bad kiwei pat ki riewlum hapoh ka jylla Meghalaya.
