Katkum ka Indian Council of Medical Research (ICMR), ka jingdon kiba ioh pang bampong (Cancer) ha Meghalaya ka long, ki shynrang 1 na ki 5 ngut bad ki kynthei ka long 1 na ki 9 ngut. Ia kane la pyntip da ka Dr Anisha Mawlong ka HoD, jong ka Oncology Department ka Civil Hospital Shillong bad kala ong ruh, ba ka Meghalaya ka wan baar ha baroh kawei ka Ri ia ka jingdon kiba ioh pang Cancer. Ka Dr Anisha kala pyntip ruh ba ka Meghalaya ka wan ba nyngkong ha India haba iadei bad ka jingdon kiba ioh pang Cancer na ka jingdih ne bam duma (Tobacco). “Katkum ka ICMR baroh ngi tip ba ka Meghalaya ka wan baar napdehg ki Jylla hapoh ka Ri ba bun kiba ioh pang Cancer, ha kaba ki shynrang ka long 227.9 ngut na ki 1 lak ngut ki nongshong shnong bad ki kynthei 118.6 ngut na ki 1 lak ngut ki nongshong shnong” la ong ka Dr Anisha. Ka Dr Anisha kala pyntip ruh ba ka Meghalaya ka wan ba nyngkong napdeng ki ba ioh pang Cancer ryngdang (Cancer of the Food Pipe).
Kala iathuh ba ka jingpang Cancer kam dei tang ha ka jaka sor hynrei kane ka jingpang kala pur ruh sha ki thain nongkyndong jong ka Jylla bad kala bynrap da kaba ong “Kum ka jingpang Hypertension bad Diabetes kiba pyniap briew jar jar, ka Cancer ruh kadei ka jingpang ba pyniap jar jar ia ki nongshong shnong ka Meghalaya. Ha kaba iadei bad ki sienjam ba ka Sorkar Jylla kala shim ban rat dyngkhong ia ka jingpang Cancer, ka Dr Anisha kala pyntip ba ha ka Shillong ki don 2 tylli ki Hospital ban sumar iaki ba pang Cancer kata ka Shillong Civil Hospital bad ka North Eastern Indira Gandhi Regional Institute of Health and Medical Sciences (NEIGRIHMS). Ka Dr kala iathuh ba ka don ka Cancer Wing hapoh ka Civil Hospital kaba 90 tylli ki jingthiah bad shen kane ka Hospital kan ioh iaka Machine Linear Accelerator bad ka Bracket Therapy ban sumar ia kiba ioh pang Cancer.
“Nalor ki tiar ban sumar iaka jingpang Cancer, ka Sorkar Jylla kala pyntreikam da ka Meghalaya Cancer Prevention and Early Detection Mission bad lyngba kane ka Mission, yn eksamin iaki paidbah ban lap haka por ba biang bad ban sumar iaka jingpang” kala ong. Ka Dr Anisha kala iathuh ba ha u bnai Naiwieng bad Nohprah 2023, la wad bniah da kaba leit sha ki 11 tylli ki District ka Jylla ban eksamin ia ki paidbah ban lap, mano kiba lah ban don ia ka jingpang Cancer.”Naki 11 tylli ki District, tang 1093 ngut kila wan shakhmat ban eksamin bad napdeng kine la lap ba 15 ngut ki don jingpang Cancer bad 71 ngut kidei kiba hap ban eksamin bniah ha Shillong Civil Hospital” kala ong. Ka Dr kala iathuh ba hadien ba la eksamin bniah ia ki 71 ngut ha Shillong Civil Hospital, la lap ba napdeng kine, 40 ngut ki don jingpang Cancer bad lada khien kyllum lang napdeng ki 1093 ngut ba phah eksamin paidbah, 55 ngut ki don ia ka jingpang Cancer. “Nga kyntu ia ki paidbah ban wan shakhmat ban phah eksamin, shisien ha ka lai snem ban lap kloi iaka jingpang Cancer, namar lada lap kloi, ka jingsumar kan long kaba suk, bad kito kiba don ka jingpang, kin ioh ia ka jingkoit ba pura” kala pynkut.
