U Symbud Myntri Rangbah ka jylla u bah Prestone Tynsong ula ong, ba ki briew mynta haba ki iaid ha Khyndai Lad, kin sngew kumba iaid sha ri phareng ban iohi ba ieng ka Five Stare Hotel ka Crowborough Hotel. Haba kren ha ka jingrakhe ia ka sngi seng ka NPP mynta ka sngi, u bah Prestone ula ong ba naduh ba ialam ka NPP ia ka sorkar ieng ter ki Five Star Hotel ha Khyndai Lad. Ula ong ba bun ki briew ki shu lap miet tang ban kynthoh ia ka sorkar NPP hynrei ki kam radbah ba trei ka sorkar kaba ialam ka NPP ym lah shuh ban niew. U bah Prestone ula pynkynmaw ba ka Crowborough Hotel ha Khyndai Lad, ka dei kawei na ka Hotel kaba la sahteng da ki phew snem naduh ka por ba u dang leit klas haduh ba ula long Myntri ha u snem 2013. “Bun kiba kynroi prie ban ioh sngew ia ka kyrteng kane ka hotel. Naduh ba nga dang leit klas ha Shillong haduh ba ngan long MLA ha 2003, shu ioh sngew tang ka kyrteng ka Crowborough Hotel ha Khyndai Lad bad ka shu sah kut hi kumjuh hynrei hadien ba la wan shimti ka NPP ia ka sorkar, ka kylla Five Star Hotel pynban kum sha ri phareng,” ong u bah Prestone.
Ula ong ba kawei pat ka Five Star ka Marriot ka la long ka nongmuna ba radbah ka sorkar NPP. U la bynrap ba ym pat phoh sniew ban iohi ia ka Swimming Pool hapoh Hotel hynrei ha Marriot lah ban iohi ia ka Swimming Pool ban leh kmen hai re hai, kaba ithiang kaba itynnad bad ula buh jingkylli, mano ba leh ia kane. Nangta ula ong ruh ba ka Lariti Performing Arts ha Mawkasiang, kaba heh tam ha ka jylla, mano ba leh, ka IT Park ha New Shillong bad bun kiwei ki kam ba radbah bad ki briew ki dei ban leit peit ban iohi ia ka jingshisha namar lada ong u Conrad, u Prestone kin ong kiba thok, hynrei kaba sngew lyngngoh ka long ba don kiba ong ba kin leit iasoh noh sha u Prah, ne iasoh noh sha kata kata ka party hana ba ka party NPP ym long shuh.
Hynrei u bah Prestone u la ong ba ma u shimet, lada long sa kumno kumno ruh un sah marwei ruh kam pher namar ba ka party kaba la ai ia ka identity haduh katne ban kyntiew ia ka jylla. Ula ong ba ka NPP ka la pynkylla dur ia ka sor Shillong baroh kawei bad ha une u snem ban wan, ka dorbar ba nyngkong kan long ha iing dorbar thymmai bad kine ki dei ki kam ba radbah jong ka sorkar NPP.
