U Shri Ashishkumar Chauhan, MD bad CEO jong ka National Stock Exchange (NSE), u la pynpaw ia ka jingmynjur kaba khraw ia ka dorbar mang tyngka 2024, da kaba u la iaroh ia ka halor ka jingphai khmat sha ki lad ai kam ai jam bad ban kyrshan ruh ia ka seng kam sengjam lajong. U Chauhan u la ban halor ki mat ba kongsan ia kaba la kren da ka myntri ka tnad pla tyngka ka Nirmala Sitharaman kiba long ki mat kiban nang kyntiew shuh shuh ia ka ioh ka kot.
U Chauhan u la ai ka jingiaroh ia kane ka dorbar mang tyngka kaba la ban jur halor ki ar tylli ki mat ha kaba iadei bad ka jingthaw ia ki lad aikam aijam la ka long ha ki jaka trei ki riew shimet bad ha ki jaka treikam sorkar. U la kdew ba ki sienjam ba la shim ha kane ka dorbar mang tyngka, ka kynthup ia ka jingpyllait ia ka jingsiew khajna ba la tip kum ka angel tax bad ban nang kham pynheh shuh shuh ia ka jingairam ba la tip kum ka Mudra loan scheme ba ka 10 lak tyngka sha ka 20 lak tyngka na ka bynta uwei u briew, ia kaba la saindur ba kan nang lah ban kyntiew ia ka sengkam sengjam bad pynshlur ia ki briew ba kin sdang ia ki kam lajong.
Nalor kane, U Chauhan u la pynpaw ba ha kane ka dorbar mang tyngka la phai khmat ruh kumno ban kyntiew ia ki kynthei ba kin iashim bynta ban trei ia ki kam ki jam bapher bapher, ia kaba la khmih lynti ba ki briew kiba treikam ki nang bun. Ha kane ka dorbar mang tyngka la phai khmat ha ka liang ban kyntiew ia ki sap ki phong jong ki briew, kumjuh ruh ka jingmang tyngka ban tei ia ki jingtei bad ka jinglah ban pynhiar ia ka fiscal deficit sha ka 4.9% ne ka jinglah ban pynhiar ia ka jinglut bad pynbun ia ka jingioh, ruh la iakren. U Chauhan u la iaroh ia ka ia ka jinglah ban pynbiang hapdeng ka jinglut bad ka jingkiew ha ka ioh ka kot, da kaba ai jingiaroh ia kane ka dorbar mang tyngka kaba la wanrah ia ki sienjam kiba biang ba bit. U Chauhan u la pynpaw ba kane ka dorbar mang tyngka kaba mynta ka long kaba biang tam bad u la ong ba ka long 10/10 namar ki sienjam kiba bit ba biang ha ki sngi bad ki por ban wan.
