U Chief Executive Member (CEM) ka KHADC u bah Pyniaid Sing Syiem hynne ka sngi u la plie ka jaka khem met ka jaka sumar (Spa) ka ‘Dwar Jingkhiah’ ha shnong Laitmawsiang, Laitkhroh Khatar shnong. Kane ka dwar jingkhiah ka long na bynta ban pynneh ban kyntiew ia ka rukom sumar Khasi bad ka long katkum ka jingstad u Khasi ha kane ka juk mynta. Ia kane ka jaka khem met, la pyniaid da ka Grassroot hapoh ka jingialam ka Kong Mayfareen Ryntathiang bad ki nongkhem ha kane ka jaka kidei kiba la ioh ia ka jinghikai na ki jaka hikai ba paw kum na Courtyard Marriot, Institute of Hotel Management. Haba kren ha kane ka sngi u bah Pyniaid ula pynpaw ia ka jingkmen ba la ioh plie paidbah ia kane ka Dwar jingkhiah bad u la kitbok kitrwiang ban lah pyntyllun ia kane ka jaka sumar. “Ha ka jingsngew jong nga lada don kano ka jingpang ne pang met pang phad, lada wan ha kane ka jaka ka Dwar Jingkhiah la sngew ioh jingkhiah lypa shwa ban rung,” ong u bah Pyniaid. U la ong ba kum u CEM ka daw bah ba u wan ha kane ka jingialang kalong namar ba kane ka kam ka iadei bha bad ka District Council na bynta ban pynneh pynsah ia ka riti dustur bad ka jingsumar tynrai.
“Ka District Council ka la wanrah da ka ain kaba tip ka The Khasi Hills Autonomous District and Promotion and Protection of Khasi Traditional Medicine Act,2011 bad ngi la wanrah ruh ia ka Rule 2013. Kane ka ain kan ai bor ia ki nongsumar dawai tynrai ha ri Khasi ym shuh ban shu sumar da rieh khlem da nud pyntip ne pynbna paidbah hynrei ki lah ban buh da ka Signboard baheh ha phyllaw iing ban pyni ba ki la ioh ia ka lisen na ka Council,” ong u CEM. U la ong ba ka jingdon ki nongsumar bad ki nongaidawai khasi ki don kumba 1000 tam ki nongsumar dawai tynrai ha ri Khasi bad haduh mynta ki don kumba 200 ngut kiba la ioh ia ka lisen ne ka syrnod na ka Council. U la ong ba ka jingthmu ba seng ia kane ka dwar jingkhiah ka long ban pynneh ban kyntiew ia ka jingstad tynrai u Khasi ha ka jingsumar bad ai dawai.
U la kyntu ia ka bor shnong bad ia ki paidbah ban kiar na kaba thang khlaw namar ba kan pynduh jait ia ki kynbat dawai bad kan pynjot ia ka mariang.Kumjuh la ioh ia ka jingkren na ka kong Mayfareen, u Prakash Verma, u General Manager ka SIDBI nalor kiwei de.
