U Myntri Rangbah ka Jylla Meghalaya u Conrad K Sangma hynne ka sngi u la pyllait paidbah ia ki skhim GREEN Meghalaya Plus. Ka GREEN Meghalaya Plus kadei ka skhim ban iarap pisa iaki ba shimkhia ban pynbha bad jingpynheh pynsan ia ka mariang bad iaki khlaw ki btap. Kane ka skhim ka kyrshan ia ki shnong, ki Kur, ne ki briew shimet kiba kular ban pynneh pynsah bad iada ia ki khlaw mariang naka bynta 30 snem ba duna eh. Haba kren ha kane ka sngi, u Conrad u la ong “Ka long kaba myntoi na ka bynta ki paidbah, ka imlang sahlang, bad ka pyrthei baroh kawei ba dei ban shim ïa ka prokram PES ha ka kyrdan jong ka Ri bad ha ka pyrthei. Ka long ka jingdonkam jong ka por. To ngin iada ia ki khlaw ki btap shuwa ba kin duh bad kata ka dei shisha kaei kaba ka Green Meghalaya ka dei bad ngi sngew sarong shisha ia kane ka prokram ba pawnam kyrpang. Dei na kata ka daw ba ngi thrang bha ban leit sha ka ‘Green Meghalaya Plus’, kaba dei ka kyrdan kaba bud jong kane ka prokram kaba kongsan bha”.
Kawei na ki jingkylla kaba kongsan tam ha ki kyndon jong ka PES 2.0 ka long ka jingpynbun ia ka jingpynbna ia ka jaka na ka bynta ban iashim bynta. Ha kaba ka skhim kaba mynshuwa ka donkam ia ka khlaw kaba duna eh 2 hektar, ki kyndon thymmai mynta ki pynduna ia kane tang 1 hektar, kaba ailad ia ki trai jaka bad ki shnong kiba kham rit ban pyndonkam. Kane ka pynthikna ba ki jingmyntoi jong ka skhim kin kham sam kylleng bad ba kham bun ki briew ki lah ban noh synniang sha ka jingpynneh pynsah ia ka pateng khlaw jong ngi. “Kam dei tang shaphang ka mariang kaba ngi ïakren hangne. Ka jingiada ia ki khlaw ki btap ka long kaba kongsan bha ia ngi wat na ka jingpeit jong ka Finance Commission. Ha ka por jong ka jingpynkylla ia ka khajna kaba jia , kaba long kaei kaba ka tnad pla tyngka ka leh, ka jingtap khlaw ka don ka bynta kaba kongsan tam ha kaba iadei bad ka jingbun paid jong ki khajna kiba ngi ioh na ka jinglum khajna beit kaba ka sorkar India ka leh.
Katba ngi dang ai pisa ban pynbun ne ban iada ne pynneh pynsah ia ka jingtap khlaw jong ngi, ym tang ba ngi pynthikna ia ka mariang ba ngin leh ia kane hynrei ka ktah ruh ia ka pisa tyngka. Ka dei ka jingmyntoi kaba shai bad ka jingjop na ka bynta baroh” u la ong. Ha kane ka sngi, u Myntri Rangbah u la sam ïa ki song pisa (Cheque) sha ki nongïoh jingmyntoi na ka FOCUS, CM-Elevate, bad ka GREEN Meghalaya+. Ka CM-ELEVATE Phase 1 bad 2 ka la ai jingmyntoi ïa ki 2,281 ngut ki briew shimet da ki song pisa ba kot T.60 klur katba ka bynta ba ar jong ka FOCUS ka la kyrshan ïa ki 3,777 ngut ki nongïoh jingmyntoi kaba kot T.17.59 klur tyngka.
