Ka tnad Social Welfare hynne ka sngi ka la plie ia ka Half Way Home Rehabilitation of Persons Living with Metal Illness ne ka jaka sah na bynta ki kynthei ba don ka jinduna ha ka bor pyrkhat bad ia ka Ambulance ne kali kit nongpang ha Saw Mer, Dong Pynthor, Upper Shillong. Ia kane ka jaka sah ki kynthei kiba don jingduna ha ka bor pyrkhat bad ia ka Ambulance, la plie paidbah da u Myntri ka Tnad Social Welfare u Bah Paul Lyngdoh, ha ka jingdonlang u Nongialam ka Liang Pyrshah ka iingdorbar thawain ka jylla u Bah RV Lyngdoh, ka Deputy Commissioner ka East Khasi Hills ka Kong RM Kurbah, ka Director jongka Tnad Social Welfare ka Kong CD Lyngwa bad kiwei kiwei.
U Bah RV Lyngdoh ula iaroh ia ka jingshimkhia jong ka Tnad Social Welfare hapoh ka jingialm u Bah Paul Lyngdoh bad ula ai ka jingiaroh ia baroh ki nongpeit nongsumar ia kine ki nongpang namar ka kam kaba ki trei ka long kaba khraw bha bad u ngeit skhem ba u Blei yn sa ai khusnam iaka jingtrei shitom ka jongki. Ula bynrap kum u MLA ka thaiñ u long uba kloi ban ai ia kano kano ka jingiarap na ka bynta kane ka Half Way Home.
U Bah Paul Lyngdoh ula iaroh iaka jingtrei shitom jong ki ophisar bad ki nongtrei jong ka tnad Social Welfare ha ka jingshakri na ka bynta ka bha ka miat jong iaka imlang sahlang bad ula pan ruh iaka jingkyrshan bad jingiatreilang jong baroh. Ula bynrap ka la long lypa kaba eh ban iatrei bad ki briew kiba biang nadong shadong kumta ka jingeh kan long kaba kham khraw shuh shuh pat ban iatrei khamtam bad ki briew kiba don jingduna ha ka bor pyrkhat pyrdain.
Ka Half Way Home ka dei ka jaka sah jong ki Kynthei kiba don jingpang ha ka bor pyrkhat bad kumba long mynta ki don 25 ngut kiba sah ha kane ka jaka ban ioh iaka jingsumar bad kine kidei kiba shong bsa sah ha kylleng jong ka ri India bad hadien ba kine ki nongpang kila koit la khiah noh kin sa ioh ban leit phai noh sha ki iing ki sem ki jongki.
