Ka Iew Janmiet ha Nan Polok ka wanrah ka jingiadei bad kiwei ki jaidbynriew

Ha kine ki sngi ki briew ki ia mih ban leit sha ka iew janmiet ha Nan Polok. Hadien bun ym ju khang shuh ha ka por 5 baje janmiet kumba ju long, ka phalor ka plie ia ki nongdie jingieid ban plie ia ki dukan jong ki ban pynkylla dur ia ka Nan Polok da ki jingthaba bad jingshai, ka bam ka dih lem bad ki jingput jingtem ban pynshongshit. Haba peit ia ki dukan, ngi lah ban shem ia ki dukan bam bad kiwei kiwei ki dukan ba die ia ki mar ba bun jait lem bad ka jingdon ka rynsan ka put ka tem bad ngi ai khublei ia ka MGMP namar kane. Hadien ka por 5 baje janmiet ki paidbah ki la sdang ban ia tuid sha kane ka jaka ban wad ia ki jaka ban ioh shong jahthait hajan ka rynsan ban ioh sngew ia ki sur jingrwai katba kiwei pat ki iaid pyngngad sharum shaneng ban peit ia ka jingitynnad ka Nan Polok bad ban rung sha ki dukan ba don sawdong kane ka jaka naduh ba la plie paidbah ha ka 19 Tarik Kyllalyngkot. Kane ka iew ka plie lad ia ka jingiadei hapdeng ki jaidbynriew bapher bapher bad ka jingpynneh ia ka riti dustur. Ym kum ha ka por mynsngi, kane ka iew janmiet ka wanrah ia ka jingiadei lyngba ka put ka tem, ka bam ka dih bad ki mar ba shu shna hi. Ha une u bnai baroh shibnai, la sakhi ia ka jingwan jong ki briew bapher bapher sha kane ka jaka. Ki la mad ia ki jingbam kiba bang bad ba shngiam, ki la peit bad thied ia ki tiar ki tar bad ki la peit iap mat ia ka jingitynnad jong ka jaka. Man ki dukan ki don la ka jong ka jong ka jingitynnad kaba pynpaw ia ka jingriew spah ka kolshor bad ki riti dustur jong ngi.

Ha kane ka iew miet, ka jingphai khmat ka long ha ka kamai kajih hynrei ban don ka jingiadei bajan bad ki nongdie jingdie. Ka pynpaw ia ka mynsiem ha Meghalaya kum ha ka sngi iewbah ha kaba ki briew ki leit shaiew ym tang ban leit siew leit tda. Ka kren ka khana ka iaid shaid shaid hapdeng ki nongdie bad nongthied kaba wanrah ia ka jingiajan ha ka imlang. Ka iew ka hat kam da dei eh ka jaka ban ia sngewbha, ka dei ka rynsan ia ki nongseng kam lajong, ki nongrep, ki nongshna tiar ban ioh ban pyni iaka sap ka phong jong ki. Ka jinglong jan ka ai lad ia ki nongwan ban ban bad leh sngewbha ia kaei kaba ki lah ban ai kum ka bam ka dih, ki tiarki tar bad ki mar rep ha ka dor kaba tad ha kane ka iew

Hapdeng ka bor digital ka bym donkam ia ka jingiashem mar met, ka iew janmiet ha Nan Polok ka ieng kum kata kaba ju long ban iashen bad iakynduh markhmat. Kiba haiing hasem, ki lok ki jor bad wat ki nongwei ki iakynduh da ka jingsngewtynnad, ban iasam ym tang ia ki jingbam hynrei ia ki khana bad ka rkhie sngewbha. Haba sakhi ia kum kane ka jinglong jingman ka wanrah ia ka jingsngew long trai bad jingsngew long paralok ka long kaba bha ka ban beh noh ia ka jingsngew iapher jaidbynriew ka ban pynskhem ia ka jingiadei para briew Haba u bnai Lber u la wan, ka iew janmiet ka la jam sha u bnai ba khatduh. Ha ka jingiakren ba lyngkot bad ki nongpyniaid ka pynpaw ia ka jingthmu ban leh kmen ia kane ka jingjop da ki prokram ba kyrpang. Na ka bynta kito kiba kwah ban lait na ki jingbun kam ba man ka sngi, ka jingleit sha ka iew janmiet ha Nan Polo mynta u bnai phin mad ia ka jingkmen bad jingsngewbha.