Ka ilekshon kam dei ban wanrah jingiapher niam bad jaidbynriew: Fr Richard

U Vicar General ka Jylla Niam Bah Shillong, u Fr. Richard M Majaw ula ong, ka jingwan ka ilekshon ha ka ri kam dei ban long ka daw ban wanrah pynban ia kano kano ka jingsngew pher niam ne sngew pher jaitbynriew. Haba kylli halor ka jingjia dang shen ba shah byrngem kawei ka skul ha thain Ri-Bhoi ban pynlong jingduwai, u Fr. Richard u la ong ba halor ka jingjia, kila wad jingtip bad kila sngew ba kato ka jingjia kam dei kaba la wanrah da ka jingthoh ne kaba la wan shisha sha kato ka skul hynrei ka don pat ka bynta kaba ki mut ban leh ia kita kiei kiei.

U la ong ba hangne ha Meghalaya ban wanrah ia ka jingiapher niam ka long kaba bakla, bad ym dei ban shah ban pyniapher niam na ka daw ka jingiapher jaitbynriew ne na ka daw jingpher niam hynrei dei ban ieng skhem ha ka jingngeit blei da kaba ia im iasah ryngkat. “Halor ka jingjia, ngi la wad jingtip, ngi sngew ba kato ka jingjia kam dei kaba la wanrah da ka jingthoh ne kaba la wan shisha sha kato ka skul hynrei ka don pat ka bynta kaba ki mut ban leh ia kita kiei kiei”, u la ong.

Lah ban kdew ba dang shen, kawei ka skul Balang Khristan, la kynnoh ba ka la shah byrngem ha ki briew na thain Assam ban khang ia ka jingduwai bad buh dur Jisu ha kawei na ki skul ha Marmain, Ri-Bhoi. “Ngi kwah ban ong  kumba la kren ha ki por ba la dep, ba ka wan ka elekshon MP ha ka ri, ki briew baroh ki dei ban long kiba husiar, ban ym dei ban shah pynshit, ban shah wiang ding. Kane ka elekshon ka iaid, hynrei ym dei ban shah ialam bakla ha ki bor kiba wan ha ka imlang sahlang, halor ka jingjia hangne ha Meghalaya”, la ong u Fr. Richard.