Ka jingshah khang ban iaid na ka jingkieng Umiam, ka la buh jingeh ia ki nongleit nongwan bad kumjuh ia ki bos heh kiba hap pynhiar bad kit briew na kiwei ki jylla namar ba kim lait ban wan sha ka Inter-State Bus Terminal (ISBT) ha Mawlai, Mawiong. Namar kane ka jingkhang ban iaid na jingkieng Umiam, ka la pyllong ia ki bos ban ieng noh ha surok Damsite hajan ka jingkieng ba don ka Police Station Umiam. Ka jingshna ia ka ISBT ha Mawiong, Shillong kam don jmgmut namar ki bos heh mynta ki hap ba ieng ha Damsite. Ha ka jingleit jurip ha kane ka sngi Saitjain, la iohi ba kine ki bos ki la ieng bun tylli ha katei ka jaka ban pynhiar bad kumjuh ban kit briew. Ha jingkieng Umiam, la shna da ki khilon nar na baroh ar liang ka jingkieng ha kaba ki kali kiba lah ban iaid kin dei tang kiba hap hapoh ka jingthew ka khilon nar.
Ka jingpyrkhing ka sorkar ban iaid kali heh kiba khia na jingkieng Umiam, ka long ban phikir lypa na kano kano jingma jong ka jingkieng dam kaba la synjor. Dang shen, u Symbud myntri rangbah ka jylla u bah Sniawbhalang Dhar ula pyntip hapoh ka Iing dorbar ba ki don 29 tylli ki bos kynthup 12 tylli ki State Transport Corporation, 6 tylli jong ka Meghalaya Transport Corporation bad 6 tylli jong ka Assam State Transport Corporation bad Arunachal Pradesh State Transport Corporation nalor 17 tylli ki bos kiba la pyniaid ki riew shimet.
Ka jingkhang ka jingkieng Umiam, kala pyllong ia kiba leit kiba wan ban wai taksi na Shillong ban leit buh leit shaw bad kane kala wanrah ka jinglut kaba ar shah bad ktah ia ka iarong pisa jongki. Lano ki bos kin ioh ban wan kiew biang sha ISBT ha Mawiong, ka long ka jingkylli kaba eh ban jubab namar ba katkum ka jingong u symbud myntri rangbah, ka sorkar ka dang pynkhreh ban pynheh ia ka surok na Umroi sha Mawlai bad yna la dep, lah ban pyniaid ia ki bos, bad ki kali heh na katei ka jaka, ban kiar noh na ka jingkieng Umiam.
