U Deputy Commissioner ka East Khasi Hills u SC Sadhu ula pyntip ba ka iingkashari kan shim ia ka rai ha ka 27 tarik u Jymmang ha kaba ia dei bad ka jingthmu ban phah mih noh ia kiba sah beaiñ ha ka jaka jong ki shipai ne Defence Estate Office kaba don ha Lum Survey marjan bad ka Them Metor. U SC Sadhu ula kren ia kane hynne ka sngi hadien ba la wai ka jingialang ba ula lum ba wan ban iashim bynta da u Chief Executive Officer jong ka Shillong Cantonment Board (SCB) bad Shillong Municipal Board (SMB). Ula ong, katei ka jaka ba don kiba sah be-ain ka hap ha ka Defence Estate Officer Guwahati ha kaba ula wan shim bynta ha ka jingialang mynta ka sngi bad batai ia ka histori bad ia ki sienjam ba ki la shim bad kaei ka hukum ba la pynmih da ka iingkashari halor katei ka jaka bad ha kine ki shi sngi ne ar sngi kin sa ai lut ia ki jingtip sha ngi bad kane kan iarap ia ngi ia kaei kaba ngi dei ban leh nangne shakhmat.
“Kaei ba la mih na ka jingialang ka long ba ka Defence Estate Office ka la jop ia ka mukotduma halor ka jinglong trai ia ka jaka bad hadien kane ki la ai ia ka Eviction Notice ne Notis phah mih noh ia kiba sah beain, hynrei kine ki la leit sha ka iingkashari ka la pynmih ia ka ‘Stay Order’ ne pynneh kumba ka long bad ka la bthah halor ka jingphah mih noh dei ban bud ryntih ia ki kyndon aiñ bad ha ka jingtian bishar ha u Nohprah 2023 ka iingkashari ka la buh tarik ban shong bishar biang halor ka kam ha ka 28 tarik u Jymmang 2024” la ong u SC Sadhu. U DC ula ong halor ka jingujor ba ki don ki briew ba leh ia ki kam sniew ula pan ia ki jongtip ba bniah na ka tnad pulit ban tip ia ka jinglong jingman ha katei ka jaka. “Nga la bthah ia u Superintendent of Police jong ka East Khasi Hills ba yn aiti ia ka kaiphod halor ka jinglong jingman ha katei ka jaka khnang ba yn ioh ban leh ia kaba donkam haba ka don kano kano ka jingpynkhein ia ki kyndon aiñ” ong u DC.
Ula iathuh ba ka tnad pulit kan sa aiti ia katei ka kaiphod ha kine ki sngi ban wan. Haba kylli la u don jingthmu ban phah lum jingtip kaba thikna ia ka jingdon jong ki briew kiba sah beaiñ ha katei ka jaka, u DC ula ong, “Ia mynta hi ngim don jingthmu eiei namar ba kane ka kam ka dang don hapdeng ka jingshah tian bishar bad kan shim ruh ia ka rai ha ka 27 tarik u Jymmang, kumta ngin ym phah leh survey eiei hynrei ngin sa ioh pdiang ia ki jingtip lyngba ka jingleh survey ka jongki bad kila dep ruh ban kdew iala u pud u sam bad ia ka jinglongtrai ia ka jaka la pynskhem ha ka Defence Estate Office, Guwahati”. Ha kaba iadei bad ka jingkynnoh ba don ki jongleh ia ki kam sniew ha katei ka jaka, u DC ula ong ba ka jingialang kala shim ia ka rai ban thaw da ka Joint Committee halor kane ka mat.
“Ngi la shim ia ka rai ban thaw ia ka Joint Committee hapdeng ka DC Office, SCB, SMB bad ki pulit bad ngin sa phah ia ka kynhun ba kan leit jurip ia katei ka jaka ha kaba iadei bad ka jingioh ia ka kaiphod ha kaba iadei bad ka shongsuk shongshngain bad ha katei ka jingjurip ngin peit ruh ba dei ban pynsangeh ia kino kino ki kam beain kiba don ha katei ka jaka” ong u SC Sadhu bad ka bynrap ba katei ka jingjurip kan long mynta ka taiew. Ula ong ba kila pan ruh ia ka kaiphod na ki pulit halor ka jingkynnoh ba ka don ka jongkhaii droks ha katei ka jaka bad ban kin pynthikna ia ki kam kiba leh ha katei ka jaka. U DC ula ong ba ka iingkashari ka la ai Stay Order tang halor ka jingphah mih noh ia ki, hynrei kam khang pat ia ki lada ka don kano kano ka jingktah ia ka shongsuk shongshngain bad shim ia kino kino ki sienjam ban pynneh ia ka shongsuk bad shongshngain.
