Ka Meghalaya State Pollution Control Board (MSPCB) kaba don ha Lumpynngad Shillong kadei tang ka jaka ba tes ia ki tdem kali rit, lait noh ki kali heh.
Haba iakren bad u Member Secretary ka Meghalaya Pollution Control Board u bah u GH Chyrmang, ula iathuh ka leh ia ka jingtes ia ka tdem jong ki kali ka long ban lap ia ki kali kiba la palat ne em ia ka jingthew ba buh katkum ka saiantiphik method.
U bah Chyrmang ula iathuh ba mynta ki la don ia ka jingthmu ban khang noh ia kane ka jaka tes namar ba baroh ki pollution Clearance mynta ki la iaid lyngba online bad ka sorkar ka la sdang ban pynkhreh shaid shaid ia kane.
Ula iathuh ba ki la ioh pdiang ia kiba bun ki jingujor na ki paidbah kiba la wan tes, namar ba ynda la poi sha Guwahati kim pdiang ia ka Clearance Certificate namar ba kam ju paw bad kim lap online.
“Ngi la mynjur ba ngin sahngeh noh, ngi ap sa tang ia ka por ba ka Transport kan sdang noh ia ka teknoji kaba thymmai kaba la tip kum ka Automobile Testing Centre,” ula ong.
Ula ong, “ Mar ia sdang ka rukom pyniaid ba thymmai, ngi na Scientific Branch ngin ieh noh namar ngim don ia ki jingdonkam ban lah ban pyniaid lyngba online.”
Katkum ka jingiathuh u bah Chyrmang ki kali ha kane ka jaka ha ka shi sngi shi sngi ki shait poi kumba 75-80 eiei tylli ban wan thew ia ka tdem kali bad don ruh ki sngi ba ki poi kumba 320 tylli ki kali kynthup ki scooty, ki kali rit , ki sumo lait noh ki kali heh.
Ka rukom thew ia ki kali ka long ha ar bynta na ka bynta ki petrol bad ki Diesel, ki kali kiba biang ki ioh da ka srynod jyrngam katba kiba palat ka jingmih tdem jaboh katkum ka jingthew kin ioh da ka syrnod ba saw.
Ia ki kali ba iaid da ka Petrol la ju shim T. 120 bad ia ki kali diesel la shim T.150 bad ia ki Scooty la shim ha ka dor T.60.
“Hangne la test tang ia ki kali rit ki Light Motor Vehicle (LMV) bad ia ki kali heh ban tes hangne ruh ym don jaka,” ula ong.
Ula ong ruh ba na ka liang ka MSPCB dang shen ki ladep phah jingthoh ruh sha ka sorkar jylla ban kyntu ban ai jaka ha New Shillong khnang ban lah ban leh ban pyniaid ia shibun ki tes.
“ Kumba long mynta ka jaka hangne ka khim bha bad wat tang ki Quarter ka jaka sah na bynta ki nongtrei ruh ym don. Namarkata ngi kyrpad ia ka sorkar ba kan ai jaka iangi ha New Shillong,” ula ong.
Ki kali ar shaka, ka jingpynmih tdem kam dei ban palat ia ka 4.5 percent ka lyer carbon monoxide bad hydrocarbon, ki kali saw shaka ki
dei ban ym palat ia ka 3.0 percent.
“Kiba palat ia ka jingthew katkum ba la buh, kin ioh ia ka srynod saw bad kiba biang, kin ioh da ka syrnod jyrngam”, ong u bah Chyrmang.
“Ki kali ki dei ban don ka syrnod jyrngam ba long ban iaid, bad kiba ioh ka syrnod saw ka pyni ba kidei ki kali ki bym long shuh ban iaid” u la ong.
Ula iathuh ba ynda ka jingpeit ka kham pyrkhing bad lada la jur ka jingkhynra ki pulit, ki tuid bun ki briew kiban wan tes ia ka tdem.
