Ka Dorbar Umroi Pyllun ka pdiang sngewbha ia ka jingpynheh ka sorkar ia ka Kad Liengsuin ha Umroi. Ka Dorbar Pyllun ka la pynpaw ruh ia ka jingkyrmen ba ka sorkar kan pynsted noh ia ka jingtrei khnang ban lah ban wan dem ki liengsuin baheh ban kan long ruh ka lad ban aikam aijam ia ki samla. Ha ka jingiakren bad u Rangbah shnong ka Umroi u bah Pynwanbor Sylliang, ula ong ba ka Dorbar shnong bad ka Airport Authority of India ki don ka jingiadei kaba sngewtynnad namar man ki por haba lait ki kam ki ju ai jingtip sha ka shnong khnang ba ki samla kin iohthep ia ki kam ba lait.U Rangbah shnong ula ong ba lada ka sorkar ka shimkhia ban pynheh ia ka Kad liengsuin, ka jingiohkam iohjam kam dei tang ia ki nong Umroi hynrei kan long ia ki jylla baroh kawei. Katkum ka jingong u bah Sylliang ka shnong naduh kulong kumah mynshwa ka la don ka jingiateh bad ki nongpyniaid ka Kad Liengsuin ba ia kam Grade IV dei ban pynrung shwa ia ki trai shnong na kane ka thain.
“Haba lait kino kino kam haba iadei bad ki Ground Staff jong kino kino ki liengsuin, ki ju pyntip sha ki nongialam shnong bad ka shnong ka kyntu ia ki samla ba kin ia thep ia ki kam ba lait,” ong u bah Sylliang.Ula bynrap, “ Ka jingiohkam na ka jingdon ka Kad Liengsuin Umroi, nyngkong kiba iohkam iohjam kidei ki nongniah kali tourist, ka plielad ruh ia ki briew kiba ai wai iing namar ba ki nongwan hiar ha katei ka kad liengsuin ki ju wan sah wai, ki dukan sha dukan ja ruh ki ioh kamai bad ki khynnah samla ruh ki bym donkam mynta ki la ioh ban rung kam ha katei ka kad liengsuin. Ngi khmih lynti ba lada pynheh ia ka kad Liengsuin kin dang thaw lad kamai shuh shuh ia kiba bun.”Ha kajuh ka por, ula ong ba lada ka sorkar ka pynheh ia ka kad liengsuin ha Umroi kam dei pat pat ban pynduh ia ka surok kaba la don lypa hynrei kadei ban pynioh ia ka surok kaba bha bad ka jingkieng kaba thymmai.
Haba iadei ba ka jingpynheh ia ka kad liengsuin, ka sorkar ka shim bun ki jaka na ki riew shimet bad hyndiat ka la shim na jong ki shipai Cantonment.“Ki paidbah nongshong shnong kim don kano kano ka jingpyrshah hynrei ki pynpaw ba ia ka surok ba la don lypa ymdei ban pynduh bad ka sorkar kadei ban thaw ia ki lad ki lynti ban pynioh ia ka surok kaba bha bad ka jingkieng kaba thymmai,” ula ong.
