Ka jingiakhun ha kane ka Ilekshon MP Lok Sabha na Shillong Parliamentary Seat ka dei hapdeng ka National People’s Party (NPP), Congress bad ka Voice of the People’s Party (VPP) hynrei nga skhem jingmut ba ka NPP kan ioh ka jingjop. Ia kane la ong da u Myntri Sorkar Jylla u Bah A.L Hek uba dei ruh u nongialam ka Bharatiya Janata Party (BJP) Meghalaya bad ula ong ba um itynnad satia ia ka jingialp ilekshon da ki katto katne ki nongialam kiba ialap da kaba kren pynmong ia kiwei pat.
Haba kren sha ki lad pathai khubor, u Bah Hek ula ong ba ka BJP ka la trei borbah ban ialap ilekshon ia ka kyrtong jong ka NPP kaba dei ruh ka Party kaba iatreilang hapdeng ka National Democratic Alliance (NDA) ba ialam da ka BJP. “Ngi ki nongtrei ka BJP Meghalaya ngi la trei shitam katkum ka khubor ba phah da ki nongialam na Delhi ban kyrshan iaka NPP bad ngi la pynlong shibun ki jingialang kynthup hapoh ka Constituency jong nga bad ha kiwei kiwei ki Constituency” la ong u Bah Hek.
Haba pynrem iaki jingkynthoh ktien pynrem iaki katto katne ki nongialam kiba ialap ilekshon, u Bah Hek ula ong “Nga la sakhi shibun ki ilekshon MP haka jingiaid lynti jong nga bad kane kadei ka sien ba nyngkong ban lap baka ilekshon kala kylla long ka jingikawang ktieh, ka jingmih ka jingiabein para Party ia kaba nga itynnad shisha”. U Bah Hek ula ong ba kane kam dei ka rukom ialap ilekshon khamtam hapoh Meghalaya ne ha kano kano ka Jylla ban ialap ilekshon.
