U Mission Director ka DREAM (Drug Reduction Elimination & Action Mission) u bah FG Kharshiing hynne ka sngi ula lum jingialang ban iathir halor kumno ban pynduh jait ia u drok ha kane ka jylla. Ha kane ka jingialang la wan iashim bynta da ki dorbar shnong, ki sengbhalang, ki kynhun bapher bapher na bynta ban iathir kumno ban iakhun pyrshah ia ka jingjyllei u drok ha ka jylla. Haba kren sha ki lad pathai khubor, u bah FG Kharshiing u la ong ba mar ia shimti ia kane ka kam dang shi sngi ar sngi bad ula khot ia ka jingialang ha ka 14 tarik Naiwieng 2024 ia ki dorbar shnong, ki seng, ki samla pule ban iasyllok iathir kumno ban pynduh ia u drok. “Nga la lum ia ka jingialang bad ki Dorbar shnong, ki kynhun, ki samla, ki seng balang ban pynduh jait ia u drok.
Kane ka kam ka dei kaba khia bha hynrei ryngkat ki Balang, ki Shnong, ki Seng, ki kynhun, ki samla, ngin lah ban pynduh jait ne ban tehlakam ia u drok”, la ong u bah FG Kharshiing. U bah Kharshiing ula pynpaw ia ka jingsngewkhia namar ka jingjyllei jong ki briew kiba pyndonkam ia u drok kynthup naduh ki khynnah, ki samla bad kiwei kiwei ki rta. “Ban iakhun ia u drok kam dei kaba suk, ka dei kaba khia bha hynrei ym dei ban long u maw jynthut ban pynduh jingkyrmen bad dei ban iakhun ban pynduh jait ia u drok,”ula ong.
Ka jingsaphriang jong u drok ka la long kaba la palat ha kaba bun bun palat ki khynnah kiba la pyndonkam bad kane ka la ktah ym tang ia ka iing ka sem, ka ktah ia ka imlang sahlang bad kumjuh ia ka kamai kajih, ula ong. U la ong ba ka donkam ban pynduh jait ia u drok bad lyngba ka jingiatreilang bad ki skul, ki balang, ki seng, ki shnong, yn lah ban tehlakam ia kane ka jingeh jong ka imlang sahlang khamtam na u drok.
