Ka jingiakob shet jyntah ha ka jylla Meghalaya ba la ai kyrteng “Hills on a Plate: Meghalaya Chef Wars” shen yn sa pyni paidbah ha ka JioCinema. Ki nongshet ba tbit ka jylla kin iakob shet ia ki jingbam na ka bynta ban ioh ia ka khusnam bad ha kane ka prokram yn pyni ia ki paidbah ia ka jingitynnad ki jaka ha kylleng ka jylla Meghalaya, ha kaba ki nongshet jingbam kin iakhun ban shet ia ki jyntah bad ki jingbam ba phylla jong ka thaiñ.
Kane ka prokram kan sdang da ka Episode ba Nyngkong “MEET THE 7” ha kaba 7 ngut ki nongshet ba tbit kin iakob shet bad ha ka Episode ka Baar, “Waterfall Trails and Turmeric Tales,” ka dei kaba la ring ha ki jaka ba itynnad jong ka Jaintia Hills, ha ka Episode ba Lai, “Fishing for Flavors in Garo Hills,” yn pyni sha ki paidbah ia ki jingitynnad jong ki jaka, ki lum ki wah jong ka ri lum Garo. Katba kiwei pat ki Episode la pynkhreh ban pyllait ha ka 27 tarik u Iaiong.
Ha kane ka prokram iakob shet, ki nongbishar ki kynthup ia ka Sarah Todd jong ka Master Chef Australia, Ardahun Passah bad William Diengdoh kum ki nongbishar bad u Gordon Thabah bad ka Abigail Pamei kin long kum ki nongpyniaid. Katba ki nongshet ba iashim bynta ha kane ka jingiakob ki kynthup ia u Artet Kharsati, Ivan Suting, Adonijah Lyngdoh, Daei Suchiang, Tanisha Phanbuh bad ka Nambie Marak.
