Ka jingïatreilang ka NPP-BJP ka dei ba ki buh thong ban jop 370 : Pala

U kyrtong MP ka Congress na Shillong Parliamentary constituency u bah Vincent H Pala, u la kynnoh ba ka jingbuh thong ka BJP ban iatreilang bad kiwei ki party kum ka NPP ka dei namar ba ki angnud ban ioh 370 ngut ki MP ban pynkylla ia ka riti synshar ka ri. Haba kren ha ka jingialap paidbah ha Laitumkhrah, u bah Pala u la ther ia ka BJP kaba la pyndonkam da ka NPP ha kane ka ilekshon MP Lok Sabha tang na bynta ka jingmyntoi hadien habud. U bah Pala u la ong ba ki paidbah ki dei ban husiar ban jied ia ka NPP namar ba ka dei ka kti ka kjat jong ka BJP. U la ong ba ka jingbym pynieng kyrtong ka BJP ha Meghalaya kadei namar ba kam sngew poi sha ka thong ha ka elekshon sha ka Lok Sabha hynrei ka pyndonkam da ka NPP, ban pan pat ia ka MP sha Rajya Sabha, khnang ba kan lah ban leh katba ka donkam ha Rajya Sabha.

“Ka jingbuh thong ka BJP ban iatreilang bad kiwei ki party kum ka NPP ka dei namar ba ki angnud ban ioh 370 ngut ki MP ban pynkylla ia ka riti synshar ka ri ban pynduh ia ka jinglong laitluid ka jingmane blei ha ka ri bad ki angnud ban pynbna ia ka India kum ka ri Hindu, ” u la ong. U la kynnoh ruh ba ka BJP ka iarap ia ki sorkar jylla ban pyntreikam ia ki kam pynroi da kaba pyndap ram katba ha ka por ba synshar ka Congress ka shu iarap ei beit khlem da pynkit ram. “Ka BJP kam ai  jingiarap eiei ha kane ka jylla hynrei ka ai da ka ram kum na Japan International Corporation Agency-JICA, Asian Development Bank (ADB), World Bank bad na kiwei ki tnad ban pynkit ram ia ki jylla, ” la kynnoh u bah Pala.

Ha kajuh ka por, u la takrain ia ki nongialam ka Congress kiba ieh jyndat ia ka party na bynta ka jingmyntoi shimet, ym na bynta u paidbah. “Ka Congress ka long kum ka shlem kaba hikai bad pynmih ia ki riew sain pyrthei bad kumba ka long ha kane ka sorkar ba mynta ruh, mar shiteng ki myntri sorkar, ki dei kiba phet na ka Congress kynthup ka kyrtong ka NPP kaba dei ka MLA na East Shillong,” ong u bah Pala.